გარახის (ნაჯაგუს) ციხე

გარახის (ნაჯაგუს) ციხე სამეგრელოში, ჩხოროწყუს მუნიციპალიტეტის სოფელ გარახაში მდებარეობს. ამ ადგილს წარსულში ნაჯაგა ერქვა და გარახის ციხე ნაჯაგუს ციხის სახელითაც არის ცნობილი. ნაგებობა XVI-XVIII საუკუნეებით თარიღდება. სიმაგრემ ძალიან დაზიანებული სახით მოაღწია, შედარებით უკეთაა შემორჩენილი ორი კოშკი. ციხეს მესამე კოშკიც ჰქონია, რომელიც თითქმის სრულად დანგრეულია. შეიმჩნევა გალავნისა და გალავნის შიდა ნაგებობაბათა ნაშთები. ეზოში ჩანს ქვევრებიც. ერთი კოშკი მაღალზეა აგებული და სავარაუდოდ სათვალთვალო დანიშნულების უნდა ყოფილიყო. აქედან საკმაოდ დიდი ტერიტორია კონტროლდება. ნაგებობა კვადრატული ფორმისაა. სამხრეთის მხრიდან, სამი მეტრის სიმაღლეზე, კოშკს დატანებული აქვს შესასვლელი ღიობი. კედლებში გაჭრილია სათოფურები. მეორე შემორჩენილი კოშკი ზედა კოშკზე უფრო დიდია და უკეთაც არის შემონახული. შესასვლელი ჩრდილოეთიდან აქვს მოწყობილი. ნაგებობის დასავლეთით ქარაფია.