ხოჯორნის ეკლესია

ხოჯორნის ეკლესია ქვემო ქართლის მხარეში, მარნეულის მუნიციპალიტეტის სოფელ ხოჯორნში მდებარეობს. იგი განვითარებული შუასაუკუნეების (X-XV სს) ძეგლია. ტაძარი გუმბათიანი, გეგმით „ნახევრად თავისუფალი“ ჯვრის ტიპის ნაგებობაა. სამხრეთის, ჩრდილოეთისა და დასავლეთის მკლავები სწორკუთხაა, ხოლო აღმოსავლეთის მკლავი აფსიდითაა დაბოლოებული. საკურთხეველს ორივე მხარეს აფსიდიანი სათავსოა. ტაძრის ინტერიერი ოთხივე მკლავში გაჭრილი თითო მაღალი, შიგნითკენ გაფართოებული სარკმლითა და გუმბათის ოთხი სარკმლით ნათდება. მკლავთა გადაკვეთაზე თარო-ცერობიან იმპოსტებს ოთხი შეისრული თაღი ეყრდნობა. კვადრატიდან წრეზე გადასვლა განხორციელებულია აფრებით, რომლებიც სუფთად ნათალი ტუფითაა გამოყვანილი. აფრებს ზემოდან საზღვრავს ორმაგი გრეხილი ლილვით მორთული შვერილი თარო-სარტყელი. საკურთხევლის აფსიდი სამი საფეხურითაა შემაღლებული. ტაძრის კედლებში ჩაშენებულია შუასაუკუნეების ქართული სტელების ფრაგმენტები. გარდა სტელებისა კედლებში ჩადგმულია და იატაკზე აწყვია სომხური ხაჩკარების ფრაგმენტები. გამორჩეულია აღმოსავლეთის ფასადი, რომელზეც სამი სარკმლის ღიობია გაჭრილი. ცენტრალური სარკმელი მუქი ფერის ტუფის ქვითაა გამოყვანილი. სარკმლის თავსართზე ორფიგურიანი საქტიტორო კომპოზიციაა გამოკვეთილი - დიდებულსა და სასულიერო პირს მაღალი რელიეფით ნაკვეთი ეკლესიის მოდელი უჭირავთ. რელიეფი წითლიდაა დაფერილი და განმარტებითი სომხური წარწერები ახლავს. ამ კომპოზიციის ქვემოთ, სარკმლის მარცხენა წირთხლზე, ხელებგანპყრობილი მცირე ზომის მამაკაცის გამოსახულებაა შემორჩენილი. შესასვლელი ორია - სამხრეთითა და დასავლეთით. დასავლეთის შესასვლელს ამჟამად მიწის დონე მთლიანად ფარავს. ეკლესიას უმეტესად ერთი ტიპის ლილვის, წრეთარგისა და თაროსაგან შემდგარი ლავგარდნები ამკობს. ეკლესია ნაგებია თეთრი ფერის გამარმარილოებული კირქვის არასწორი ფორმის ნამტვრევი ქვით. ნაგებობა ქვის ლორფინებით ყოფილა გადახურული. ტაძრის ირგვლივ ძველი საფლავის ქვებია.