მამუკას ციხე

მამუკას ციხე აჭარაში, ქობულეთის მუნიციპალიტეტის სოფელ ალამბარში მდებარეობს, „ციხისყელად" წოდებულ მთაზე. იგი XVIII საუკუნით თარიღდება. ციხე თავად მამუკა თავდგირიძეს ეკუთვნოდა, სწორედ ამიტომ დაერქვა მას მამუკას ციხე. ალამბარი XV-XVI საუკუნეებში გურიის მთავრების ერთ-ერთ რეზიდენციას წარმოადგენდა. ციხე-სიმაგრე ძალიან დაზიანებულია, იგი 1959 წლის მიწისძვრის შედეგად დაინგრა. დღემდე მხოლოდ სამხრეთ-აღმოსავლეთის კედელი შემორჩა, რომლის სიმაღლე სამ მეტრს აღწევს. შემორჩენილ ნანგრევს კოშკის ფორმა აქვს და მისი ფართობი 47 მ2-ს შეადგენს. სოფელ ალამბარში წმინდა გიორგის სახელობის ეკლესიაც მდგარა, რომელიც ამჟამად დანგრეულია.