მთაწმინდის პარკი

მთაწმინდის პარკი - გართობისა და დასვენებისათვის საუკეთესო ადგილი თბილისში. მდებარეობს 770 მეტრის სიმაღლეზე და თბილისის ყველაზე მაღალი წერტილია. მისი ისტორია 100 წელს აჭარბებს და გაშლილია 100 ჰექტარზე მეტ ტერიტორიაზე.

პარკი დაყოფილია სამ - ექსტრემალურ, საბავშვო და საოჯახო ზონად. ატრაქციონების გარდა პარკში განლაგებულია რესტორნები და კაფეები, მაღაზიები, სარელაქსაციო ზონები, სადღესასწაულო ცენტრი და ქორწინების სახლი. პარკში მდებარეობს აგრეთვე თბილისის ანძა.

მთაწმინდის პარკიდან შესანიშნავი ხედები იშლება მთელ თბილისზე.

როგორ მოვხვდეთ პარკში

პარკთან დაკავშირება ხდება როგორც სამანქანე გზით (თბილისი-ოქროყანას მიმართულება) ასევე ფუნიკულიორით, რომელიც 1905 წელს აიგო და თავის მხრივ წარმოადგენს ქალაქის ერთ-ერთ ისტორიულ ღირშესანიშნეობას.

თბილისის ცენტრიდან პარკამდე 7,5 კილომეტრია, რასაც საშუალოდ 12–15 წუთი სჭირდება მსუბუქი მანქანით და დაახლოებით 15–20 წუთი ავტობუსით. მთაწმინდის პარკის მიმართულებით 2 მუნიციპალური ტრანსპორტი მოძრაობს: #124 ავტობუსი რუსთაველის მეტროს მიმდებარე ტერიტორიიდან და #90 ავტობუსი ორბელიანის მოედნიდან. დედაქალაქიდან მთაწმინდის პარკამდე ყველაზე მოკლე გზით ტრანსპორტირება შესაძლებელია ფუნიკულიორით.

მთაწმინდის პარკიდან შესაძლებელია ასევე საფეხმავლო ბილიკით გადასვლა კუს ტბაზე.