საკანაფე (თამარის ციხე)

საკანაფე (წრიოხის ციხე, თამარის ციხე) სამცხე-ჯავახეთის მხარეში, ახალციხის მუნიციპალიტეტში, სოფელ აწყურის მიდამოებში მდებარეობს. ციხე-სიმაგრე ისტორიულ წყაროებში პირველად XVI საუკუნეში იხსენიება. საკანაფის ციხე აკონტროლებდა მის მიმდებარე ტერიტორიებს და ნიშანს აძლევდა აწყურის ციხეს მტრის შემოსევას, ის ასევე კეტავდა ხევს იმერეთიდან მესხეთისაკენ. აწყურის ციხის დაცემის შემდეგ ხალხი წრიოხის ციხეში იხიზნებოდა, იგი აწყურის შემდეგ მეორე თავდაცვის ზღუდედ ითვლებოდა. ციხე-სიმაგრის კომპლექსი მოიცავს ღვთისმშობლის სახელობის ეკლესიასაც. ტაძარი დარბაზულია და ნაგებია თლილი ქვით, ამჟამად მისი სახურავი და კედლის ნაწილი ჩამოქცეულია. ნანგვერევის სახითაა შემორჩენილი თავად საკანაფის ციხეც.