საკირეს წმინდა გიორგის ეკლესია

საკირეს წმ. გიორგის ეკლესია XIX საუკუნის გუმბათოვანი ტაძარია, რომელიც სამცხე-ჯავახეთის მხარეში, ბორჯომის რაიონის სოფელ საკირეში მდებარეობს. იგი გეგმაში კვადრატული ფორმის ნაგებობაა, რომელიც აღმოსავლეთის მხრიდან ნახევარწრიული აფსიდით ბოლოვდება, დასავლეთიდან კი მიშენებული აქვს სამრეკლო, რომელიც ტაძარში შესასვლელსაც წარმოადგენს. ეკლესიას აქვს მეორე შესასვლელიც, სამხრეთიდან. ცენტრალური გუმბათის გარშემო ოთხივე მხარეს მცირე ზომის გუმბათებია განლაგებული. ტაძარი ნაგებია თლილი ქვით და გადახურულია თუნუქით. გუმბათები და სამრეკლოს სვეტებიანი ნაწილი ცისფრად არის შეღებილი. კარები და ფანჯრები თაღოვანია და მოჩარჩოებული. არსებობს გადმოცემა, რომ ეკლესიის მშენებლობაში მატერიალური დახმარება ყველა იმ ოჯახს გაუწევია, რომელსაც ერთი ვაჟი მაინც ჰყავდა.

როგორ მივიდეთ

სოფელი საკირე ბორჯომის მუნიციპალიტეტში, მდინარე საკირულის ხეობაში მდებარეობს, ბორჯომიდან 25 კმ-ში. საკირეში მიდის მოასფალტებული გზა.