სამის (რველის) ციხე

სამის (სამნის) ციხე განვითარებული შუასაუკუნეების ძეგლია, რომელიც სამცხე-ჯავახეთის მხარეში, ბორჯომის მუნიციპალიტეტის სოფელ რველის ზემოთ მდებარეობს, ბანისხევის შესართავთან, მტკვრის მარცხენა ნაპირისკენ ჩამოზრდილ მთაგრეხილზე. იგი დიდ მანძილზე აკონტროლებს ბანისხევსა და მტკვრის ხეობას. ციხე მართკუთხა გეგმარებისაა, კუთხეებში მრგვალი ბურჯებით. შიდა ციხიდან ყველა მრგვალ ბურჯშია შესასვლელი, გარდა ჩრდილოეთის კოშკისა. ციხე ნაგებია ერთმანეთთან კარგად მორგებული ფლეთილი ქვით. ჩრდილოეთის ბურჯთან არქიტრავული შესასვლელია, რომლის უკანა ნაწილიც ხის ძელებითაა გადახურული. შიდა კედლების წყობა ფასადების ანალოგიურია. სამხრეთ-დასავლეთ ბურჯში კედლის ძირში 7 სმ. დიამეტრის კერამიკული მილია ჩატანებული. ციხე შუაფეოდალური ხანის ნაგებობათა ნიშნებით ხასიათდება. იგი ბუნებრივად დაცულ, სტრატეგიულ ადგილასაა აგებული, რაც მის დიდ მნიშვნელობაზე მეტყველებს. 

როგორ მივიდეთ

სოფელი რველი ბორჯომის მუნიციპალიტეტში, მდინარე მტკვრის მარჯვენა ნაპირზე მდებარეობს, ბორჯომიდან 7 კმ-ში. სოფელში მიდის მოასფალტებული გზა. გზიდან ციხემდე ფეხით გასავლელია 1 კმ.