სკალდის მთავარანგელოზის ეკლესია

სკალდის მთავარანგელოზის ეკლესია სვანეთში ლენტეხის მუნიციპალიტეტში, სოფელ ფაყთან ახლოს მდებარეობს, მთაზე. იგი X საუკუნის ეკლესიის ადგილასაა აგებული. ძველი ეკლესიის ორნამენტული ქვები ეკლესიის ბაქანზეა დაწყობილი. სკალდის ეკლესიიდან შესანიშნავი ხედები იშლება. ტაძარი დარბაზულ ნაგებობას წარმოადგენს, აღმოსავლეთით ნახევარწრიული აფსიდით. საკურთხეველი გამოყოფილია ხის კანკელით. დარბაზის კამარა პილასტრებზე გადაყვანილ საბჯენ თაღებს ეყრდნობა. ინტერიერი მთლიანად მოხატულია. ფასადები მთლიანად შელესილი და შეთეთრებულია. სამხრეთისა და ჩრდილოეთის ფასადები დეკორირებულია თაღედებით. ერთადერთი შესასვლელი დასავლეთიდანაა. ეკლესიას დასავლეთიდან მიშენებული აქვს კარიბჭე, რომელიც სამი მხრიდან თაღებითაა გახსნილი. კარიბჭის თავზე რელიეფური ჯვრის გამოსახულებაა. ტაძრის დასავლეთით ორსართულიანი სამრეკლოა, ორივე სართული ოთხი მხრით თაღებითაა გახსნილი. პირველი სართული ტაძრის ეზოში შესასვლელ კარიბჭეს წარმოადგენს, მეორე სართულზე კი სამრეკლოა მოწყობილი. ეკლესია და სამრეკლო ხელოვნურად შექმნილ ბაქანზე დგას.