სოხუმის ბოტანიკური ბაღი

სოხუმის ბოტანიკური ბაღი აფხაზეთში, ქალაქ სოხუმში მდებარეობს. ამჟამად აფხაზეთის ტერიტორია ოკუპირებულია რუსეთის მიერ. ბოტანიკური ბაღი 1840 წელს შეიქმნა და ერთ-ერთი უძველესია კავკასიაში. მისი დაარსება რუსეთის შავი ზღვის ფორტიფიკაციის ხაზის მეთაურს - ნიკოლაი რაიევსკის უკავშირდება. 1853-55 და 1877-78 წლებში, რუსეთ-თურქეთის ომის პერიოდში, სოხუმის ბოტანიკური ბაღი თურქებმა გაჩეხეს, 1894 წელს კი ნარგავების აღდგენითი სამუშაოები დაიწყო. დღესდღეობით ბოტანიკურ ბაღს ხუთი განყოფილება აქვს: ფლორის, ინტროდუქციის, მეყვავილეობის, დენდროლოგიის და მცენარეთა დაცვის. აქ 4 500-ზე მეტი სახეობის მცენარეა თავმოყრილი მსოფლიოს სხვადასხვა ქვეყნიდან. სოხუმის ბოტანიკური ბაღი მრავალფეროვანი უნიკალური მცენარეებით, აუზებით, სასეირნო ბილიკებითა და დასასვენებელი არეებით უამრავ ადამიანს იზიდავს, იგი ქალაქის ერთ-ერთი პოპულარული ღირსშესანიშნაობაა.