ციხისჯვარის წმინდა გაბრიელის სახელობის ეკლესია

ციხისჯვრის წმ. გაბრიელის ეკლესია XXI საუკუნის ბაზილიკაა, რომელიც სამცხე-ჯავახეთის მხარეში, ბორჯომის მუნიციპალიტეტის სოფელ ციხისჯვარში მდებარეობს. იგი ნაგებია თლილი, მონაცრისფრო ქვით. ტაძარი აღმოსავლეთით ნახევარწრიული აფსიდით ბოლოვდება, რომლის გადახურვაც უფრო დაბალია, ვიდრე მთავარი დარბაზის ორფერდა გადახურვა. ეკლესიას ექვსი სარკმელი აქვს, ორ-ორი გრძივ კედლებზე, ერთი აფსიდის ცენტრში და ერთიც შესასვლელის თავზე. შესასვლელი დასავლეთიდანაა და იგი ფასადიდან განსხვავებული ფერი არქიტრავის ქვით არის გამოყოფილი. მის თავზე მოთავსებული სარკმელი სწორკუთხაა, ხოლო აფსიდისა და გრძივი კედლების სარკმლები - თაღოვანი. ტაძრის გრძივ კედლებსა და აფსიდს თაროსებური კარნიზი შემოუყვება, დაბლა კი ძირითადი საშენი მასალისგან განსხვავებული ქვის არშია აქვს შემოვლებული. 

როგორ მივიდეთ

ციხისჯვარი ბორჯომის მუნიციპალიტეტში, მდინარე შავიწყლის ნაპირზე მდებარეობს, ბორჯომიდან 21 კმ-ში. ციხისჯვარში მიდის მოასფალტებული გზა.