წმინდა თევდორეს სახელობის ეკლესია მეტეხში

მეტეხის წმინდა თევდორეს სახელობის ეკლესია შიდა ქართლის მხარეში, კასპის მუნიციპალიტეტში, სოფელ მეტეხში მდებარეობს. იგი XVI-XVIII საუკუნეების დარბაზული ეკლესიაა. ტაძარი ნაგებია რიყისა და კლდის ქვებით. გეგმით სწორკუთხა ნაგებობა ინტერიერში აღმოსავლეთით ნახევარწრიული აფსიდით სრულდება. აფსიდის იატაკი, დარბაზთან შედარებით, ერთი საფეხურითაა ამაღლებული. ეკლესია სამ თაღზე დაყრდნობილი ნახევარცილინდრული კამარითაა გადახურული. ტრიუმფალური თაღი კაპიტელებზე გადასულ პილასტრებს ეყრდნობა, მეორე თაღი - კრონშტეინებს, მესამე კი - კაპიტელებსა და პილასტრებს. აფსიდის ცენტრში სწორკუთხა სარკმელია, სამხრეთის ფასადიში სამი სარკმელია, ერთი სარკმელი შიგნიდან თაღოვანია, გარედან კი - შევიწროებული და სწორკუთხა, მეორე და მესამე სარკმლები სწორკუთხაა. შიგნიდან თაღოვანი და გარედან სწორკუთხა სარკმელია დასავლეთის ფასადზეც. აფსიდის ჩრდილოეთითა და სამხრეთით ნიშებია აღმოსავლეთ ფასადზე გამავალი ვიწრო სარკმლებით. შესასვლელი სამხრეთიდანაა, რომელიც შიგნიდან თაღოვანია, გარედან კი სწორკუთხა. ეკლესია გადახურულია ღარიანი კრამიტით.