უშგულის ეთნოგრაფიული მუზეუმი

უშგულის ეთნოგრაფიული მუზეუმი სვანეთში, მესტიის მუნიციპალიტეტში, უშგულში მდებარეობს. იგი XIII საუკუნის ორსართულიან საცხოვრებელ ნაგებობას, ე.წ „მაჩუბ დარბაზს“ წარმოადგენს. ორივე სართული შენარჩუნებულია პირვანდელი სახით. მუზეუმში შეძლებთ გაეცნოთ სვანური საცხოვრებლის ტიპს, იქაურ ცხოვრების წესს და მრავალ საინტერესო ეთნოგრაფიულ მასალას. აქ ნახავთ სასოფლო-სამეურნეო და საბრძოლო დანიშნულების იარაღებს, საკულტო ნივთებს, ხის ძველ ავეჯს, რკინისა და თიხის საყოფაცხოვრებო ნივთებსა და ა.შ. პირველი სართული განკუთვნილი იყო ზამთარში ადაიანებისა და საქონლის ერთობლივ სადგომად. საქონლისა და ადამიანების სადგომი ერთმანეთისგან გამოყოფილია ხის მოჩუქურთმებული ტიხრით. აქვე დაათვალიერებთ მახვშის სკამს, მოჩუქურთმებულ განჯინას და სხვა საინტერესო საყოფაცხოვრებო ნივთებს. მეორე სართულზე განთავსებულია ხის ორი უძველესი საწოლი, თხა-ცხვრების დასაბინავებელი თაღოვანი სადგომი, სამზარეულო, ე.წ „ბოჯარი“, თავისი მოწყობილობებით, სვანური აკვანი, XVII საუკუნის ჰორიზონტარული საქსოვ-სართავი დაზგა თავისი ატრიბუტებით და სხვა. უშგულის ეთნოგრაფიული მუზეუმი ერთ-ერთი საინტერესო ადგილია სვანური კულტურის გასაცნობად.