ზაქარია ფალიაშვილის ძეგლი ბორჯომში

ზაქარია ფალიაშვილის ძეგლი სამცხე-ჯავახეთის მხარეში, ბორჯომში, რუსთაველის ქუჩის განაპირას მდებარეობს. ზაქარია ფალიაშვილი ქართველი კომპოზიტორი, დირიჟორი, პედაგოგი, საზოგადო მოღვაწე და ქართული ეროვნული საკომპოზიტორო სკოლის ფუძემდებელი გახლავთ. იგი დაიბადა 1871 წელს ქუთაისში, გარდაიცვალა 1933 წელს თბილისში. უმაღლესი მუსიკალური განათლება მოსკოვის კონსერვატორიაში მიიღო. მოსკოვში ჩამოაყალიბა ქართველ სტუდენტთა გუნდი და მართავდა ქართულ ხალხური მუსიკის საღამოებს. 1903 წელს ის საქართველოში დაბრუნდა და დაიწყო ინტენსიური შემოქმედებითი, პედაგოგიური და საშემსრულებლო მოღვაწეობა. მუშაობდა სამუსიკო სასწავლებელსა და ქართულ გიმნაზიაში, აქტიურად მონაწილეობდა „ქართული ფილარმონიული საზოგადოების“ დაფუძნებაში. მისი განსაკუთრებით ცნობილი ოპერაა "დაისი". ფალიაშვილის შემოქმედება ქართული ეროვნული კულტურის ერთ-ერთი უდიდესი მონაპოვარია. მისი სახელობისაა თბილისის ოპერისა და ბალეტის თეატრი, ასევე ქუჩები და სახლ-მუზეუმები სხვადასხვა ქალაქში.