ზემო ყარაბულაღის (შავწყაროს) ეკლესია

ზემო ყარაბულაღის ეკლესია ქვემო ქართლის მხარეში, დმანისის მუნიციპალიტეტში, სოფელ ზომო ყარაბულაღში მდებარეობს. იგი X-XI საუკუნეებით თარიღდება. ნაგებობა დარბაზულია, აღმოსავლეთით ნახევარწრიული აფსიდით სრულდება. აფსიდი ორი საფეხურითაა შემაღლებული. ეკლესიას აქვს სამკვეთლო და სადიაკვნე. შიგა სივრცე პილასტრებით სამ ნაწილადაა დაყოფილი. სვეტებს შორის გადაყვანილი ისრისებრი თაღები სიგრძივ კედლებზე ღრმა უბეებს ქმნიან. ფასადები შემოსილია ბაზალტის თლილი ქვით. ფასადებს შემოუყვებოდა სადა პროფილის მქონე ლავგარდანი, რომელიც ამჟამად დიდწილად განადგურებულია. ტაძრის ზედა ნაწილს ეტყობა გადაკეთების კვალი. აღმოსავლეთის სარკმელი შემკულია ჩუქურთმით, რომელიც ნახევრად დამტვრეულია. სარკმლის გვერდით რელიეფური ჯვრის გამოსახულებაა. შესასვლელი ორია, სამხრეთიდან და ჩრდილოეთიდან. სამხრეთის შესასვლელი არქიტრავულია, ჩრდილოეთისა კი - თაღოვანი. სამხრეთის კარის თავზე ასომთავრული წარწერაა ამოკვეთილი, სადაც მოხსენიებულნი არიან დავით და კვირიკე მეფეები. ეკლესია საკმაოდ დაზიანებულია და მძიმე მდგომარეობაშია.

ეკლესია აგებულია ტაშირ-ძორაკეთის მეფეების კვირიკე და დავით ბაგრატუნის მიერ