ედისის ეკლესია

ედისის ეკლესია მდებარეობს ცხინვალის რეგიონში, ჯავის მუნიციპალიტეტის სოფელ ედისაში. ძეგლი ქართულ-ოსური კონფლიქტის შემდეგ მოექცა რუსეთის მიერ ოკუპირებულ ტერიტორიაზე. ტაძარი თარიღდება გვიანი შუასაუკუნეებით. იგი ჯვარგუმბათოვანი ნაგებობაა, რომელსაც აღმოსავლეთით, შვერილი, წახნაგოვანი აფსიდი აქვს. ეკლესიის შიდა გეგმარება გამოვლენილია გარე მასებშიც. გუმბათი რვაწახნაგაა და ჯვრის მკლავების გადამკვეთ კუთხეებს ეყრდნობა. გუმბათის ყველა წახნაგში თითო თაღოვანი სარკმელია. თითო სარკმელია ჯვრის სამივე მკლავშიც, თუმცა ისინი სწორკუთხაა, გუმბათის სარკმლებისგან განსხვავებით. ფასადები სადაა, არ გვხვდება არანაირი დეკორატიული ელემენტი. ეკლესიას სამი ფართო შესასვლელი აქვს. ჩრდილოეთისა და სამხრეთის შესასვლელებს ორივე მხრიდან ნახევარპილასტრები აუყვება. ნაგებობა აშენებულია სხვადასხვა სახისა და ზომის ქვით, გამოყენებულია ტუფი და შირიმი. ტაძარი ამჟამად საკმაოდ დაზიანებულია.