ფარავნის ეკლესია

ფარავნის ეკლესია მდებარეობს სამცხე-ჯავახეთის მხარეში, ნინოწმინდის მუნიციპალიტეტის სოფელ ფარავანში.

იგი X-XI საუკუნეებით თარიღდება. ფარავნის ეკლესია დარბაზულ ნაგებობას წარმოადგენს, ნაგებობა გადახურულია კამარით. აფსიდში ორი პატარა ნიშია. საკურთხეველში დევს ტრაპეზის ქვა. შესასვლელი ერთია – სამხრეთიდან, იგი გარედან არქიტრავულია, შიგნიდან კი – თაღოვანი. არქიტრავზე ჯვრები და ორნამენტული რელიეფებია გამოსახული. მოჩუქურთმებული სათაურებითაა შემკული სარკმლებიც. სამხრეთის ფასადზე კიდევ რამდენიმე რელიეფია ჩართული. აქვეა ასეომთავრული წარწერა, რომელიც შემდეგნაირად იკითხება: “ქრისტე შეიწყალე პავლე”. ეკლესია რესტავრირებულია. ტაძრის დასავლეთით გვხვდება შუასაუკუნეებისათვის დამახასიათებელი ქანდაკისებრი საფლავის ქვა ვერძის გამოსახულებით. ფარავნის ეკლესიასთან ახლოს შეგიძლიათ მოინახულოთ ფარავნის ქარვასლა და XIII საუკუნის მცირე ზომის ეკლესია.