ფარავნის მცირე ეკლესია

ფარავნის მცირე ეკლესია მდებარეობს სამცხე-ჯავახეთში, ნინოწმინდის მუნიციპალიტეტის სოფელ ფარავნის ტერიტორიაზე. ის აგებულია XIII-XIV სს-ში

მომცრო ზომის ეკლესია სოფლის ქვედა უბანში, ქარვასლის სამხრეთ-დასავლეთით დგას. ნაგებია თლილი ქვით. წყობის ჰორიზონტალობა დაცულია. ქვედა რიგებში შედარებით მცირე ზომის ქვებია გამოყენებული. შესასვლელი სამხრეთიდან აქვს. ნაოთხალიანი კარი გარედან სადა არქიტრავითაა დასრულებული, შიგნიდან კი თაღოვანია. სარკმელი ორი აქვს: აღმოსავლეთის და სამხრეთის, რომელიც კარის ჩრდილო-აღმოსავლეთითაა გაჭრილი და თითქოს ფასადშია ჩაკარგული. ფასადები სადაა და ერთადერთ შტრიხს ქმნის წრეთარგისა და ლილვისგან შემდგარი თლილი კარნიზი. გადახურვა ლორფინის ქონია. ინტერიერში ტაძარი მკვეთრად აზიდული პროპორციისაა. ნახევარწრიული აფსიდა მხრითაა გამოყოფილი. ჩრდილოეთ შემკლავებაში, იატაკის დონეზე ბაზისის ქვაა ჩადგმული ფოსოთი საკურთხევლისკენ. კონქი თლილ იმპოსტებზე გადაყვანილ სატრიუმფო თაღს ეყრდნობა. კედლები დაუნაწევრებელია და მათზეა გადაყვანილი კამარა. ტაძარი დაზიანებულია: გამონგრეულია დასავლეთის ფასადის სამხრეთი კუთხე, ასევე ჩრდილოეთის კედლის შუა ნაწილი, სამხრეთი სარკმლის ღიობი.