ფასანაური

კურორტი ფასანაური მცხეთა-მთიანეთის მხარეში, დუშეთის მუნიციპალიტეტში მდებარეობს, მთიულეთისა და გუდამაყრის არაგვის შესართავთან, ზღვის დონიდან 1050 მეტრზე. იგი ისტორიულ-გეოგრაფიული მხარის, მთიულეთის ცენტრია და გადმოცემის თანახმად, ძველად ვაჭრობის ერთ–ერთ ცენტრს წარმოადგენდა. ფასანაური გამოირჩევა ბუნების სილამაზით, ტყეები, მთები და საოცარი ხედები მრავალ დამსვენებელს იზიდავს. აქ ზომიერად ნოტიო ჰავაა, ზომიერად ცივი ზამთრითა და ხანგრძლივი, გრილი ზაფხულით. საშუალო წლიური ტემპერატურაა 7,8°C, ინავრისა - -4,1°C, ივლისისა კი - 18,5°C. ფასანაურში ფუნქციონირებს სასტუმროები, ტურბაზა, საავადმყოფო, ბიბლიოთეკა და სხვა კულტურულ-საგანმანათლებლო დაწესებულებები. თუკი მთაში დასვენების მოყვარული ხართ, მთის ჰავა, სუფთა ჰაერი და ულამაზესი გარემო შესანიშნავია განტვირთვისთვის. აქ ასევე შეგიძლიათ დააგემოვნოთ მთიულური სამზარეულო, განსაკუთრებული პოპულარობით სარგებლობს ფასანაურული ხინკალი. ფასანაურში შეძლებთ დაისვენოთ კომფორტულად, ჯანსაღ გარემოში და აივსოთ დადებითი შთაბეჭდილებებითა და ემოციებით.