ფავნისის წმინდა გიორგის სახელობის ეკლესია

ფავნისის წმინდა გიორგის ეკლესია შიდა ქართლის მხარეში, კასპის მუნიციპალიტეტის სოფელ გარიყულაში მდებარეობს. იგი IX-X საუკუნეებით თარიღდება. დარბაზული ეკლესია ნატეხი და ქვიშაქვითაა ნაგები, გამოყენებულია ტუფის ქვაც. გეგმაში სწორკუთხა ნაგებობა ინტერიერში აღმოსავლეთით ნახევარწრიული აფსიდით სრულდება. ტაძარი ტრიუმფალუსა და კიდევ ერთ თაღზე დაყრდნობილი ნახევარცილინდრული კამარითაა გადახურული. თაღები პილასტრებს ეყრდნობა. პილასტრების კაპიტელები მარტივი, თაროსებრი პროფილისაა. კამარის დასავლეთ ნაწილი ახალი გადაკეთებულია და ბეტონისაა. საკურთხეველში კანკელის ფრაგმენტია შემორჩენილი. აფსიდში ერთი თაღოვანი სარკმელია, დასავლეთის კედელი ყრუა, სამხრეთის კედელში ორი სარკმელია, ჩრდილოეთისაში კი - ერთი. ფასადებს სადა ლავგარდანი შემოუყვება. აღმოსავლეთ ფასადზე, სარკმლის ზემოთ, რელიეფური ფილაა ჩასმული, რომელზეც წრე და გველია გამოსახული. სამხრეთიდან ეკლესიას ეკვდერი აქვს მიშენებული. შესასვლელის სამხრეთიდანაა. ეკლესია ორფერდა, კრამიტის სახურავითაა გადახურული.

მოხატულობა

ფავნისის წმინდა გიორგის ეკლესიის ინტერიერში შემორჩენილია მოხატულობის ფრაგმენტები. გაირჩევა მხატვრობის ორი ფენა. პირველი ფენა ტაძრის თანადროულია, მეორე ფენა კი XII საუკუნის II ნახევარს მიეკუთვნება. პირველი ფენა ძალიან დაზიანებულია და თითქმის არ გაირჩევა, შემორჩენილია ფერადი ლაქები ჩრდილოეთ კედელზე და შარავანდედიანი მამაკაცის ფიგურა სამხრეთ კედელზე. მეორე ფენის მხატვრობიდან ყველაზე კარგად საკურთხევლის ფრესკებია შემონახული. კამარისა და ჩრდილოეთისა და სამხრეთის კედლების მოხატულობის დიდი ნაწილი ჩამოცვენილია. ტაძრის ინტერიერში საუფლო დღესასწაულთა ციკლია წარმოდგენილი. კონქში ვედრების კომპოზიციაა გამოსახული. ეკლესიაში წმინდა გიორგის ამსახველი ხუთი სცენა გვხვდება. აფსიდისა და კედლების მოხატულობას ქვემოთ ორნამენტული ზოლი გასდევს. მოხატულობა შეიმჩნევა ეკვდერშიც. ეკვდერის მხატვრობა XIII საუკუნის II ნახევრით თარიღდება.