ჯინო ფერედაისი

ჯინო ფერედაისი ყველაზე დიდი აკვაპარკია თბილისში. იგი ბეშენოვას ქუჩაზე, თბილისის ზღვასთან მდებარეობს. ის ქალაქის ერთ-ერთი პოპულარული ადგილია. თუკი ვერ ახერხებთ ქალაქგარეთ გასვლას, ზღვაზე დასვენებას, გაქვთ დატვირთული გრაფიკი და დასვენება და დროის მხიარულად გატარება გსურთ, ჯინო ფერედაისი შესანიშნავ, კეთილმოწყობილ გარემოს გთავაზობთ. აკვაპარკი მოიცავს სპორტულ-გამაჯანსაღებელ კომპლექსს, 9 აუზს, წყლის ექსტრემალურ ატრაქციებს, VIP ზონაში შემავალ ველნეს და სპა დარბაზებს, პრივატულ მოსასვენებელ ბაღს, ფიტნეს დარბაზს, სასტუმროსა და „ჯინოს“ ცურვის აკადემიას. ეს მრავალფეროვანი სივრცე ყველა ასაკის მომხმარებელზეა გათვლილი. აკვაპარკში ფერადი, კეთილმოწყობილი და მხიარული გარემო დაგხვდებათ, შეძლებთ განიტვირთოთ, აივსოთ დადებითი ენერგიით და ბედნიერი დღე გაატაროთ მეგობრებთან თუ ოჯახთან ერთად. ეს საუკეთესო ადგილია ექსტრემისა და ადრენალინის მოყვარულთათვისაც, მოწყობილია 500-ზე მეტი წყლის ატრაქცია, აღმოსავლეთ ევროპაში ყველაზე მაღალი, 31 მეტრიანი ტოპოგანი, 6 სხვადასხვა ეფექტის ჩამოსასრიალებელი სლაიდით. ღია სივრცეში ბავშვები პატარა სასრიალო სლაიდებით გაერთობიან. აქვეა ბარიერების გადასალახი ექსტრემალური ატრაქცია - „ტანზანია“ და ქვიშის ფრენბურთის მოედანი. ჯინო ფერედაისი საუკეთესო ადგილია რელაქსაციისთვის, 17 სხვადასხვა სახის საუნა და სპა ზონა ყოველგვარ სტრესს მოგიხსნით. ეს ადგილი მიმზიდველია თევზაობის მოყვარულთათვისაც. აკვაპარკის ტერიტორიაზე არის პატარა ტბა, სადაც კალმახის დაჭერა შეგიძლიათ, რომელსაც ადგილზე მოგიმზადებენ. ჯინო ფერედაისს უსაფრთხო, კეთილმოწყობილი, შეზლონგებით, საშხაპეებითა და გასახდელებით აღჭურვილი საკუთარი სანაპირო ზოლი აქვს თბილისის ზღვაზე. აკვაპარკის ტერიტორიაზე 12 საკვები ობიექტია განთავსებული, სადაც გემრიელი კერძების დაგემოვნებას შეძლებთ.