ხატისსოფლის წმ. გიორგის ეკლესია

ხატისოფლის წმ. გიორგის ეკლესია მდებარეობს ქვემო ქართლში, ბოლნისის მუნიციპალიტეტის სოფელ ხატისსოფლის ტერიტორიაზე.

ეკლესია დარბაზული ნაგებობაა, სხვადასხვა ზომის ქვით ნაგები კირ-დუღაბზე. წყობა არეულია. გადაკეთების დროს კარი გაუჭრიათ დასავლეთ კედელში და აღმოსავლეთ ნაწილში, კონქის თავზე დაუშენებიათ სამრეკლო. ტაძარს შესასვლელი ორი აქვს: სამხრეთის კარი თაღოვანია, დასავლეთის კარი თარაზული გადახურვის. სამხრეთის კარი ტუფის ქვითაა მოჩარჩოეული. დასავლეთის კარის წირთხლები აგურითაა ამოყვანილი. აღმოსავლეთის, დასავლეთის და ჩრდილოეთის კედლებში თითო პატარა სარკმელია გაჭრილი. ტაძრის კედლები დასრულებულია ბატიყელა კარნიზით. სამრეკლოს ნაწილის კარნიზი მე-17 საუკუნისთვის დამახასიათებელი მცენარეული ორნამენტითაა შემკული. ტაძარი და სამრეკლო ლორფინითაა დახურული. სამრეკლო ექვსთაღიანი ფანჩატურია, რომელიც ამდენივე წახნაგა პირამიდული გუმბათითაა დახურული. სამრეკლო შელესილია. სამრეკლოს ლავგარდნის თავზე ე.წ. რუსული აგურია დაგებული. ტაძრის დასავლეთ ფასადში, სარკმლის ქვემოდან ჩადგმულია ადრეშუა საუკუნეების ბოლნური მდალიონის გამოსახულებიანი მწვანე ტუფის ქვა. აღმოსავლეთით ნახევარწეიული აფსიდია, რომელიც მხრითაა გამოყოფილი. კონქი და დარბაზის კამარა დაყრდნობილია პილასტრისა და მხრის კაპიტელებზე გადაყვანილ თლილი ქვის თაღებზე. საკურთხევლის ორივე მხარეს თითო ნიშია გაკეთებული. ჩრდილოეთის ნიში საკურთხევლის იატაკიდან რამდენიმე სანტიმეტრში იწყება და თაღოვანია. ამ ნიშში ახლა დამატებითი ტრაპეზია ჩასმული. სამხრეთის ნიში უფრო მოკლეა, მაღლიდან იწყება და სწორკუთხაა. ტრაპეზი ახალია და ეკლესიის კედელზეა მიდგმული. დარბაზის იატაკი აგურფენილია. ტაძარს გარშემოსდევს გვიანი პერიოდის ქვის დაბალი გალავანი.