კორისხევის ეკლესია

კორისხევის ეკლესია მდებარეობს სამცხე-ჯავახეთში, ასპინძის მუნიციპალიტეტში, ზედა ვარძიის მონასტრის მიმდებარედ.

მდდებარეობს კორისხევიდან ზედა ვარძიის გამოქვაბულებისკენ მიმავალ ბილიკზე, ხეობის გამყოფი სამხრეთი ფერდის მიყოლებაზე, ბუნებრივ კლდოვან მასივში მკვეთრად ამოზიდულ ნაწილში გამოკვეთილი მცირე ზომის ეკლესიაა. კლდის ამოზიდული მასა, რომელზეც კლდეში ამოკვეთილი ეკლესია მდებარეობს, არც თუ ისე მაღალია. ეკლესიის ინტერიერი ძალიან პატარაა, სივრცე _ შეკუმშული. ოთხკუთხა მოხაზულობის გეგმას, აღმოსავლეთით, კედლიდან ამოზიდული ტრაპეზის ქვა ასრულებს, რომლის თავზე ლილვით შემოსაზღვრული თაღოვანი ნიშია. ერთადერთი შესასვლელი სამლოცველოს სამხრეთიდან აქვს. თაღოვან, პროფილირებულ ჩარჩოში სწორკუთხა მოხაზულობის ღიობია ჩასმული. აგრეთვე ფიქსირდება სავარაუდოდ ქვის კარისთვის განკუთვნილი ფოსო. დღეისათვის კლდოვანი სტრუქტურის ჩრდილოეთი ნაწილი გამოქარულია და ღიობია წარმოქმნილი. ეს პატარა, მოკრძალებული ზომისა და მხატვრული ღირსებების მატარებელი ეკლესია წარმოადგენს ჯავახეთის კლდეში ნაკვეთი საკულტო არქიტექტურის ერთ-ერთ საინტერესო, თვიდმყოფად ნიმუშს. მნიშვნელოვანია დაცულ იყოს ძეგლის სტატუსით, რაც დაიცავს მას შეუსაბამო ჩარევებისაგან.

გარემო

ეკლესია კლდიანი მასივიდან ამოზიდულ ნაწილშია გამოკვეთილი. შემოსაზღვრულია ფერდებით. დასავლეთის მიმართულებით იხსნება ქორის ხევის ხეობა. აღმოსავლეთით გზა გადადის მაჰმადიანური სასაფლაოსკენ და ზედა ვარძიის მიმართულებით.