კუს ტბის საბაგირო გზა

კუს ტბის საბაგირო გზა ილია ჭავჭავაძის გამზირსა და კუს ტბას აკავშირებს ერთმანეთთან. საბაგიროს საწყისი პუნქტი ვაკის პარკთან მდებარეობს. პარკში შესანიშნავი გარემოა მოწყობილი სასეირნოდ და განტვირთვისთვის. აქ მრავლადაა საბავშვო გასართობებიც, ამოტომაც მას ხშირად სტუმრობენ ოჯახები ბავშვებთან ერთად დროის გასატარებლად. სიმწვანე, ბილიკები, ბაღები, მტრედები და დიდი, ლამაზი შადრევანი უამრავ ადამიანს იზიდავს. საბაგიროთი თბილისის ერთ-ერთი პოპულარულ ადგილას-კუს ტბაზე შეძლებთ ასვლას და ქალაქის ხედებითაც დატკბებით. ასეთი სიმაღლიდან დანახული თბილისი ნამდვილად მშვენიერი სანახაობაა. კუს ტბას ხშირად სტუმრობენ სარბენად, სავარჯიშოდ, ბუნებაში დასვენებისთვის, საბანაოდ და გასარუჯად. ტბასთან მოწყობილია ბარებიც, აქ ასევე მოქმედებს სპორტულ-გამაჯანსაღებელი და კულტურულ-დასასვენებელი კომპლექსი, რომელშიც შედის მინი-ფეხბურთის სტადიონი, ბავშვთა გასართობი მოედანი, სანაოსნო და პროფესიული საკონცერტო სცენა პონტონით, სადაც სეზონის განმავლობაში სხვადასხვა ღონისძიება იმართება. ტბაზე ნავით გასეირნებაც შეიძლება. სიმწვანეში ჩაფლული კუს ტბა თბილისის ერთ-ერთი საუკეთესო ადგილია ბუნებისა და აქტიური ცხოვრების მოყვარულთათვის. კუს ტბასთან ახლოს მდებარეობს თბილისის ეთნოგრაფიული მუზეუმიც, სადაც საქართველოს სხვადასხვა კუთხისთვის დამახასიათებელ საცხოვრებელ სახლებსა და უძველეს ძეგლებსაც დაათვალიერებთ. საბაგირო გზა XX საუკუნის მეორე ნახევარში აშენდა და 2009 წლამდე ფუნქციონირებდა. 2016 წელს კი კუს ტბის განახლებული საბაგირო გზა გაიხსნა. საბაგირო გზაზე ორი გონდოლა მოძრაობს. ილია ჭავჭავაძის გამზირიდან კუს ტბაზე მოხვედრა 6 წუთშია შესაძლებელი. თითო გონდოლა 10-12 ადამიანს იტევს. გონდოლები და სადგურები ადაპტირებულია შეზღუდული შესაძლებლობის მქონე პირებისთვის.