ქუთაისის ოპერის თეატრი

ქუთაისის ოპერის თეატრი იმერეთის მხარეში, ქალაქ ქუთაისში მდებარეობს, რუსთაველის გამზირზე. თეატრის ამჟამინდელი შენობა 1969 წელს გაიხსნა. თეატრალური წარმოდგენები ქალაქში 1861 წლიდან იმართებოდა, კირილე ლორთქიფანიძის, დიმიტრი ბაქრაძისა და აკაკი წერეთლის თაოსნობით. 1880 წელს კი კოტე მესხმა მუდმივი დასი ჩამოაყალიბა, რომელიც სტეფანე ხარაზიშვილის მიერ საგანგებოდ თეატრისათვის აგებულ შენობაში განთავსდა. ხარაზოვის თეატრი ხანძარმა იმსხვერპლა 1946 წელს. ახალი ოპერის თეატრი იმავე ადგილას აიგო და შენობის რუსთაველის ქუჩის მხარეზე მდებარე კედელი სწორედ ძველი თეატრისგან არის შემორჩენილი. ქუთაისის ოპერის თეატრი 1969 წელს 27 დეკემბერს საზეიმოდ გაიხსა ზაქარია ფალიაშვილის ოპერით - "აბესალომ და ეთერი". ქუთაისის თეატრში სხვადასხვა დროს მოღვაწეობდნენ: ლადო მესხიშვილი, კოტე მარჯანიშვილი, უშანგი ჩხეიძე, ალექსანდრე იმედაშვილი, ვასო აბაშიძე, ვერიკო ანჯაფარიძე და სხვა.