ლადო გუდიაშვილის მოედანი

ლადო გუდიაშვილის მოედანი ქალაქ თბილისში, თავისუფლების მოედანის მახლობლად, ლერმონტოვის, ბ. ახოსპირელის, გია აბესაძის, აბო თბილელისა და სხვა ქუჩების შესაყარზე მდებარეობს. იგი ისტორიული მოედანია, მოედნის გეგმა შუა საუკუნეებიდანაა შემორჩენილი, შენობათა ანსამბლი კი XIX საუკუნის მეორე ნახევარსა და XX საუკუნეს მიეკუთვნება. მოედნის გარშემო 11 შენობა დგას, რომელთაგან 9 ისტორიული მნიშვნელობისაა. განსაკუთრებულად გამორჩეულია მოედნისა და ლერმონტოვის ქუჩის კუთხეში მდგომი სახლი, ე.წ. გაზეთ „ლიტერატურული საქართველოს“ რედაქცია, რომელიც “ციხფერი სახლის” სახელითაა ცნობილი. სწორედ ამ შენობაში იყო განთავსებული რუსული არმიის შტაბი, ჰაუპტვახტი და ოფიცერთა სასტუმრო. “ცისფერ სახლში” 1838 წელს ღამე გაუთევია პოეტ მიხეილ ლერმონტოვს. გვიან შუა საუკუნეებში მოედანს „ბეჯანას ბაღი“ ერქვა. 1828 წლამდე ხალხი მას მოღნისის სახელს უწოდებდა, მოედნის ახლოს მდგარი ღვთისმშობლის სომხური ეკლესიის პატივსაცემად. XIX საუკუნეში ეს ტერიტორია რუსეთის იმპერიის კავკასიური სამფლობელოების ადმინისტრაციულ ცენტრს წარმოადგენდა. 1923 წელს მოედანს ბოლშევიკი სტეფანე ალავერდოვის სახელი უწოდეს, 1988 წელს კი მას ლადო გუდიაშვილის სახელი მიენიჭა.