მახინჯაური

მახინჯაური აჭარაში მდებარე კურორტია. იგი 1959–2011 ხელვაჩაურის მუნიციპალიტეტს მიეკუთვნებოდა, თუმცა დღესდღეობით ბათუმის დაქვემდებარებაშია. თუკი ლურჯი ზღვა, მზიანი სანაპიროები და შოკოლადისფერი რუჯი გიზიდავთ, მახინჯაური ამისთვის ერთ-ერთი შესანიშნავი ადგილია. აქ უსასრულო ზღვის პეიზაჟები და ამწვანებული გარემო ერწყმის ერთმანეთს, რაც მეტ მომხიბვლელობას სძენს ამ ადგილს. მახინჯაური კლიმატურ-ბალნეოლოგიური კურორტია. მისი ძირითადი სამკურნალო ფაქტორია თალასოთერაპია (ზღვის ჰაერითა და ზღვაში ბანაობით მკურნალობა). აქ გამოედინება მინერალური წყაროებიც, რომლებსაც სხვადასხვა დაავადებების სამკურნალოდ იყენებენ. კურორტზე განვითარებულია ინფრასტრუქტურა, აქ შეძლებთ კომფორტულ სასტუმროებში დასვენებას და ესტუმროთ რესტორნებსა თუ კაფე-ბარებს, სადაც გემრიელი კერძების დაგემოვნებას შეძლებთ. დასახლებაში არის კულტურის, განათლებისა და ჯანდაცვის დაწესებულებები. მახინჯაურიდან მარტივად შეძლებთ ქალაქ ბათუმში და მწვანე კონცხზე მოხვედრასაც. ზღვა, მზე, ლამაზი გარემო და კეთილმოწყობილი ინფრასტრუქტურა ყოველგვარ პირობას შეგიქმნით სასიამოვნო და მრავალფეროვანი დასვენებისთვის.