მალთაყვა

კურორტი მალთაყვა სამეგრელოში მდებარეობს, ფოთის მუნიციპალიტეტში, ზღვის დონიდან 0,5 მეტრზე. იგი ქალაქ ფოთის ერთ-ერთი უბანია. მალთაყვა ზღვის ნოტიო და თბილი ჰავით ხასიათდება. იანვრის საშუალო ტემპერატურაა 5 - 7℃, აგვისტოსი კი - 23 - 24℃. კურორტს დასავლეთით შავი ზღვა ესაზღვრება, აღმოსავლეთით კი - პალიასტომის ტბა. თუკი გიყვართ ქვიშიანი სანაპიროები, მზე, ზღვა, რუჯი და კომფორტული, ფერადოვანი დასვენება, მალთაყვა ამისთვის ერთ-ერთი შესანიშნავი ადგილია. მას ყოველწლიურად მრავალი ტურისტი თუ ადგილობრივი სტუმრობს. მალთაყვის ერთ-ერთი მიმზიდველი ადგილი ოქროს ტბა და მასზე გადებული საფეხმავლო ხიდია, საიდანაც ძალიან ლამაზი ხედები იშლება. ულამაზეს სანახაობას წარმოადგენს პალიასტომის ტბა, რომელიც კოლხეთის ეროვნული პარკის შემადგენლობაში შედის. პალიასტომის ტბაზე ნავით სეირნობასაც შეძლებთ. ზამთარში მალთაყვის ჭაობებს 190-მდე სახეობის მიმომფრენი და მოზამთრე ფრინველი აფარებს თავს, რომელთა ნაწილი წითელ წიგნშია შეტანილი, ამიტომაც ეს ადგილი ძალიან საინტერესოა ფრინველებზე დაკვირვების მოყვარულთათვის. კეთილმოწყობილი სასტუმროები, პარკები, ტბები, ლურჯი, ლივლივა ზღვა და მზიანი სანაპირო მალთაყვას ერთ-ერთ მიმზიდველ კურორტად აქცევს.