მამკოდა - ნორიო

ველობილიკი იწყება მამკოდასთან ახლოს, თბილისის ეროვნულ პარკში და მიუყვება გრუნტიან სამანქანო გზას მამკოდის მამათა მონასტრის მიმართულებით. მარშრუტის პირველ ნაწილში საკმაოდ დიდი აღმართების გავლა მოგიწევთ. გზა შედარებით მარტივია მამკოდის მამათა მონასტრამდე. როდესაც მონასტერთან მიხვალთ შეგიძლიათ შეისვენოთ და დატკბეთ ულამაზესი ხედებით თბილისზე. მონასტრის შემდეგ გზა კვლავ აღმართში მიუყვება ქედს. ეს მონაკვეთი ყველაზე რთულია, რადგან გზა ძალიან დაზიანებულია და დიდი აღმართი კიდევ უფრო ართულებს ველოსიპედით გადაადგილებას. გამოუცდელ ველოსიპედისტებს შეიძლება ველოსიპედის ხელით ტარება მოუწიოთ. თუმცა სულ რამდენიმე კილომეტრში თქვენ მიაღწევთ უმაღლეს წერტილს, საიდანაც იწყება დაღმართები. გზად შეხვდებით რამდენიმე ნავთობის საბადოს და ტალახს. საბოლოოდ კი სატყეო გზა ჩაგიყვანთ ნორიოში საიდანაც უკვე მოასფალტებული გზით შეუერთდებით თბილისის შემოვლით გზას.

მარშრუტის უმეტესი ნაწილი სატყეო გზას მიუყვება, რის გამოც რეკომენდებულია სამთო ველოსიპედის გამოყენება.