ნეძვის ეროვნული პარკი ბილიკი

ბილიკი იწყება სოფელი ახალდაბიდან და მიემართება შუანოს (ნეძვის) ტურისტული თავშესაფრისკენ. ნეძვის ეროვნულ პარკში ვიზიტი ფასიანია და გჭირდებათ შესაბამისი ნებართვა, რომელის აღებასაც შეძლებთ ბორჯომ-ხარაგაულის ეროვნული პარკის ადმინისტრაციაში.

ბილიკი არის წრიული და ჯამში შეადგენს 31 კილომეტრს. თავშესაფრამდე ასვლა შეგიძლიათ ორივე მხრიდან, თუმცა ჩვენ გირჩევთ, რომ ახვიდეთ სამანქანო გზით და დაბრუნდეთ საფეხმავლო ბილიკით. ასეთ შემთხვევში ნაკლები მკვეთრი აღმართი მოგიწევთ და დაშვება ლამაზ ხედებზე ბევრად სასიამოვნო იქნება.

ბილიკი მარკირებულია, თუმცა ზოგიერთ ადგილას მარკირება და ბილიკი არ ემჩნევა ამიტომ უმჯობესია გქონდეთ ტრეკი გადმოწერილი და მიჰყვეთ ნავიგაციას. სამანქანო გზიდან ასვლის შემთხვევაში გზად გხვდებათ პატარა წყარო, სადაც სასმელად ვარგისი წყალია და შეძლებთ მარაგის შევსებას. წყალი ასევე დაგხვდებათ კოტეჯის მახლობლადაც, სადაც ასევე სასმელად ვარგისი წყალია.

კოტეჯი არის 2 სართულიანი. პირველ სართულზე არის 2 ოთახი. პატარა ოთახში არაფერი არ არის, მათ შორის არც ლოგინები. დიდ ოთახში არის შეშის ღუმელი, დიდი მაგიდა და 2 ხის ტახტი, აქედანვე ადის კიბე მეორე სართულზე, სადაც ასევე არაა ლოგინები. თავშესაფარში სტუმრობისას თან უნდა იქონიოთ საგებელი და საძილე ტომარა. თუ კარავში გადაწყვეტთ დარჩენას, თავშესაფრის ტერიტორიაზე შესაძლებელია კარვის გაშლა.