ნიკო ნიკოლაძის კოშკი

ნიკო ნიკოლაძის კოშკი სამეგრელოში, ქალაქ ფოთში მდებარეობს. იგი ანსამბლურ ხუროთმოძღვრულ ძეგლს წარმოადგენს, რომელიც მოიცავს XVIII საუკუნის გალავანს, ხუთსართულიან კოშკს, ორსართულიან საცხოვრებელ ნაწილსა და XX საუკუნის 80-იან წლებში აშენებულ კაფე-ბარს. კოშკი თავიდან სამსართულიანი იყო, ნიკო ნიკოლაძემ XIX საუკუნის 90-იან წლებში მოარღვია ხის ნაწილი და ორი სართული დააშენებინა, ბოლო სართულზე საათი განთავსდა. იმავე პერიოდში ნაგებობას მიაშენეს ორსართულიანი, საცხოვრებელი დანიშნულების, ფლიგელი. კოშკის ფასადზე სართულები ჰორიზონტალური, რელიეფური სარტყლებით არის დანაწევრებული. ნაგებობა პროფილირებული კარნიზითა და ქონგურებით სრულდება. მეორე და მესამე სართულზე მოწყობილია ნიკო ნიკოლაძის მემორიალური მუზეუმი, მეოთხე სართულზე კი ნიკო ნიკოლაძის სტუმრების მისაღები ბუხრიანი ოთახია.