ნობელების მუზეუმი

ძმები ნობელების სახელობის ტექნოლოგიური მუზეუმი აჭარაში, ქალაქ ბათუმში მდებარეობს, ლესელიძის ქუჩის 3ა ნომერში. მუზეუმი 2007 წელს დაარსდა და მისი შენობა ნობელების ერთ-ერთ ოფისს წარმოადგენს. პირველ სართულზე წარმოდგენილია ექსპოზიცია შვედი გამომგონებლებისა და "ნავთობის მეფეებად" წოდებული ნობელების შესახებ, მეორე სართული კი ქართული ჩაის ისტორიას უჭირავს. მუზეუმში ასევე გაეცნობით ინფორმაციას ისეთ ნავთობმაგნატებზე, როგორებიც იყვნენ როტშილდები და მანთაშევი. აქ ასევე ექსპონირებულია ცნობილი ფოტოგრაფის - პროკუდინ-გორსკის ფოტოები, რომელიც XX ს-ის დასაწყისის საქართველოს ყოფასა და კულტურას ასახავს. მუზეუმში დაცულია ძველი ბათუმის ეკონომიკური და კულტურული განვითარების ამსახველი ექსპონატები, რომლებიც ჩაის, თამბაქოსა და ღვინის კულტურის ისტორიას გაგაცნობთ.