ნოღის ციხე

ნოღის ციხე სამეგრელოში, მარტვილის მუნიციპალიტეტის სოფელ ნოღაში მდებარეობს, სოფლის ყველაზე შემაღლებულ ადგილას. იგი XVI-XVII საუკუნეებს მიეკუთვნება. ციხე-სიმაგრე ჯერ ჯაიანების, მოგვიანებით კი დადიანების მფლობელობაში იყო. ციხე ელიფსური ფორმის ორმაგი გალავნისა და ოთხი კოშკისგან შედგება. გალავნებს შორის მანძილი დაახლოებით 2 მეტრია. ჩრდილოეთის, დასავლეთისა და აღმოსავლეთის კოშკები წრიული გეგმისაა, სამხრეთისა კი - კვადრატული. ციხე ნაგებია სხვადასხვა ჯიშის ქვის შერეული წყობით კირის დუღაბზე. ნაგებობას 2015 და 2019 წლებში ჩაუტარდა სარეაბილიტაციო სამუშაოები და ამჟამად აღდგენილია.