სათხილამურო კურორტი გოდერძი

სად მდებარეობს კურორტი გოდერძი?

სამთო-სათხილამურო კურორტი გოდერძი საქართველოს სამხრეთ-დასავლეთ ნაწილში, მაღალმთიან აჭარაში, გოდერძის უღელტეხილზე, ზღვის დონიდან 2027 მეტრზე მდებარეობს. გოდერძი თბილისიდან დაშორებულია 252 კმ-ით, ხოლო ბათუმიდან 109 კმ-ით. შავ ზღვასთან სიახლოვის გამო ეს ადგილი უხვი ნალექით გამოირჩევა, რაც კურორტს მეტად მიმზიდველს ხდის. კურორტი გოდერძი გამოირჩევა შთამბეჭდავი ბუნებით, ულამაზესი ხედებით, სუფთა ჰაერით და მრავალფეროვანი ლანდშაფტით. ერთ-ერთი საუკეთესოა გაუკვალავ თოვლში სრიალის მოყვარულთათვის. სრიალი შესაძლებელია ალპურ ზონაში, ხშირ წიწვოვან ტყეში და სოფლებშიც კი.

როგორ მოვხვდეთ კურორტ გოდერძიზე?

სათხილამურო კურორტ გოდერძიზე მოხვედრა შესაძლებელია საკუთარი ავტომობილით ან ტაქსით. ზამთარში აუცილებელია მაღალი გამავლობის ავტომობილი. თბილისიდან გოდერძიმდე უმოკლესი გზა ახალციხეზე გაივლის, თუმცა ზარზმა-გოდერძის მონაკვეთი ზამთარში დაკეტილია დიდთოვლობისა და ნამქერის გამო. ბათუმიდან გოდერძიმდე საჭიროა დაახლოებით 3 საათი. თბილისიდან ბათუმის გავლით კურორტ გოდერძიზე ჩასვლას კი ჯამში დაახლოებით 10 საათი დასჭირდება, რადგან ბათუმიდან გოდერძიმდე გზის ბოლო მონაკვეთი ცუდ მდგომარეობაშია.

სასრიალო ტრასები

კურორტზე ამ ეტაპზე წარმოდგენილია ორი მცირე ზომის საბაგირო  - (ბორანო და მოძრავი ხალიჩა). ასევე 6 ადგილიანი ბაბლის ტიპის და 8 ადგილიანი გონდოლას ტიპის საბაგიროები. შაბათ-კვირას საბაგიროები მუშაობს 10:00 დან 17:00 საათამდე, ხოლო კვირის დღეებში 10:00 დან 16:00 საათამდე.

სათხილამურო ტრასების საერთო სიგრძე შეადგენს 8 კილომეტრს, ხოლო ზღვის დონიდან მაქსიმალური სიმაღლე 2364 მეტრს აღწევს. დაშვების ყველაზე გრძელი მანძილი დაახლოებით 4.5 კილომეტრია. აქ წარმოდგენილია როგორც საშუალო სირთულის ისე რთული ტრასები. ხოლო დამწყებებს შეუძლიათ ისწავლონ სრიალი მცირე ზომის 150 მეტრიან ტრასაზე (ბორანო).

ინფრასტრუქტურა

გოდერძის სათხილამურო კურორტი 2015 წლის დეკემბრიდან ფუნქციონირებს. ინფრასტრუქტურა ჯერ კიდევ განვითარების ეტაპზეა. კურორტზე ფუნქციონირებს სასტუმრო „მეტეო“ 35 ადგილიანი და 6 კოტეჯი 70 ადამიანზე გათვლილი. კოტეჯს აქვს საერთო სამზარეულო, ტელევიზორი, ბუხარი, სამზარეულოს აქსესუარები, ცენტრალური გათბობა, უფასო wifi, თხილამურების შესანახი ოთახი, ყველაფერი რაც საჭიროა კომფორტისთვის. კურორტიდან 3 კილომეტრში, სოფელ დანისპარაულში ფუნქციონირებს საოჯახო ტიპის სასტუმროები. კურორტზე ასევე ფუნქციონირებს რამდენიმე სწრაფი კვების ობიექტი და რესტორანი. კურორტზე ასევე შეძლებთ იქირაოთ სასრიალო აღჭურვილობა, თუმცა მცირე არჩევანის გამო, უმჯობესია საკუთარი აღჭურვილობით ესტუმროთ კურორტს.

კურორტის სეზონურობა და აქტივობები

ზამთრის სეზონი კურორტ გოდერძიზე დეკემბრიდან აპრილამდე გრძელდება. თუმცა სრიალისთვის საუკეთესო დრო იანვარი - თებერვალია, რადგან ამ დროს ყველაზე მაღალი ხარისხის თოვლია.

გოდერძი დამსვენებლებს მთელი წლის მანძილზე მასპინძლობს. ზაფხულში ვიზიტორებს შესაძლებლობა აქვთ მოაწყონ სხვადასხვა აქტივობები: ლაშქრობა როგორც ალპურ ისე ტყიან ზონაში, ცხენითა და ველოსიპედით სეირნობა, სამკურნალო-მინერალური წყლების დაგემოვნება, მსოფლიოში ერთ-ერთი უნიკალური გოდერძის ნამარხი ტყის მონახულება, საუცხოო მწვანე ტბის მონახულება და ასევე ერთ-ერთი საინტერესო X-XI საუკუნის ისტორიული ძეგლის, ხიხანის ციხის მონახულება. აქვე ახლოს მდებარეობს სოფელი ბეშუმი რომელიც დიდი პოპულარობით სარგებლობს ტურისტებში.

კურორტის მთავარი უარყოფითი მხარეა დედაქალაქიდან მანძილი და გზის სირთულე, კურორტზე გასართობი საშუალებების, კვების ობიექტებისა და სასტუმროების ნაკლებობა.

თუმცა, მას ბევრი დადებითი მხარეც გააჩნია. კურორტი გამოირჩევა მრავალფეროვნებით, აქ არის კარგად აღჭურვილი სასრიალო ტრასები, თავისუფალი სრიალის მოყვარულთათვის ალპური ფერდობები, წიწვონანი ტყეები, ასევე საზაფხულო სოფლებში სრიალის შესაძლებლობა, უხვი ნალექი და ხარისხიანი თოვლი, ერთ-ერთი ყველაზე გრძელი სათხილამურო სეზონი საქართველოში, ნაკლები ხალხი და  დაბალი ფასები სხვა სათხილამურო კურორტებთან შედარებით.