შეკვეთილი

კურორტი შეკვეთილი გურიაში, ოზურგეთის მუნიციპალიტეტში მდებარეობს, შავი ზღვის ნაპირას, ზღვის დონიდან 2 მეტრზე. უკიდეგანო, ლურჯი ზღვა, მზიანი სანაპირო, მწვანე ფიჭვნარი და კომფორტული სასტუმროები ყოველწლიურად უამრავ დამსვენებელს იზიდავს. შეკვეთილში ფუნქციონირებს რამდენიმე სასტუმრო, გასართობი პარკი „ციცინათელა“, საკონცერტო დარბაზი "Black Sea Arena", „მუსიკოსთა პარკი“, „მინიატურების პარკი“ და დენდროლოგიური პარკი. კურორტის ბუნებრივი სამკურნალო ფაქტორებია ზღვისპირა ნოტიო სუბტროპიკული ჰავა, ზღვის წყალი, მაგნიტური ქვიშა. ურეკში ზღვის სუბტროპიკული ჰავაა, რბილი, უთოვლო ზამთრითა და თბილი, ნოტიო ზაფხულით. თუკი ზღვა, მზიანი სანაპიროები, შოკოლადისფერი რუჯი, მრავალფეროვნება, ფერადოვნება და გართობა გიყვართ, შეკვეთილი ამისთვის შესანიშნავი ადგილია. აქ შეძლებთ დაისვენოთ კეთილმოწყობილ, კომფორტულ გარემოში, ეწვიოთ “ციცინათელას”, სადაც ადრენალინის მოყვარულებს ექსტრემალური ატრაქციონებიც დაგხვდებათ, დაათვალიეროთ საქართველოს ღირსშესანიშნაობების მინიატურული მოდელები, დაესწროთ კონცერტებს და სხვადასხვა ტიპის ღონისძიებებს, დენდროლოგიურ პარკში გაეცნოთ სხვადასხვა ჯიშის, მცენარეებს, ცხოველებსა და ფრინველებს და აივსოთ ზღვა ემოციებით. შეკვეთილი ერთ-ერთი პოპულარული კურორტია, რომელსაც მრავალი უცხოელი თუ ადგილობრივი სტუმრობს.

ისტორია

შეკვეთილი XVIII საუკუნეში დასავლეთ საქართველოს ერთ-ერთი მნიშვნელოვანი სავაჭრო პუნქტი იყო. 1723 წლიდან შევკეთილის ციხეში ოსმალეთის იმპერიის გარნიზონი იდგა. 1812 წლიდან, ბუქარესტის ზავის მიხედვით, შეკვეთილი იგი რუსეთის იმპერიის გამგებლობაში მოექცა, შეკვეთილის შემდეგ იწყებოდა ოსმალეთის იმპერიის საზღვარი. 1813 წელს საქართველოს მთავარმმართებელ ნიკოლაი რტიშჩევის რჩევით მამია V გურიელმა წმინდა ნიკოლოზის სახელობის ციხე ააგო, რომელიც მდინარეების, ნატანებისა და ჩოლოქის ზღვაში შესართავთან მდებარეობდა. 1820 წელს რუსეთის ჯარმა შეკვეთილისა და ანაკლიის ციხეები დატოვა. 1828 წლის 15 ოქტომბერს შეკვეთილთან გაიმართა ბრძოლა, რომელიც რუსეთ-ოსმალეთის ომის ნაწილი იყო. იგი 1841 წელს გურიის აჯანყების დროს მნიშვნელოვანი ბრძოლების ადგილს წარმოადგენდა. ყირიმის ომის დროს, 1853 წლის 15 ოქტომბერს, წმინდა ნიკოლოზის საგუშაგოს თურქთა რეგულარული ჯარი და სახალხო ლაშქარი დაესხა თავს. ამ ბრძოლის შემდეგ შეკვეთილის ციხეში რუსეთის ჯარი ჩადგა. შეკვეთილის ციხე 1920-იან წლებში დაანგრიეს და მისი ქვებით ფაბრიკა ააშენეს ქვემო ნატანებში. დღესდღეობით შეკვეთილი ერთ-ერთი კეთილმოწყობილი და პოპულარული კურორტია.