შურუბუმუს მღვიმე

შურუბუმუს მღვიმე სამეგრელოში, ჩხოროწყუს მუნიციპალიტეტის სოფელ მუხურში მდებარეობს, მიგარიას მასივის დასავლეთ ნაწილში. შურუბუმუ ერთ-ერთი ულამაზესი და ჯადოსნური ადგილია საქართველოში და მრავალ ბუნებისა და მოგზაურობის მოყვარულს იზიდავს. სახელი შურუბუმუ მიახლოებითი თარგმანით სულგანაბულს ნიშნავს. კარსტული მღვიმე გამომუშავებულია ზედაცარცული ასაკის თხელშრეებრივ კირქვებში. აქ გვხვდება თითქმის ყველა სახის ნაღვენთი ფორმები. სტალაქტიდები, სტალაგმიტები, გაქვავებული ჩანჩქერები, ფორმათა მრავალფეროვნება ზღაპრულ, მისტიურ გარემოს ქმნის. შურუბუმუს ქვაბული ვიზუალურად, დედამიწის ზედაპირზე თითქმის არ შეიმჩნევა. მისი არსებობის გარკვეული ნიშნები მდ. ხობისწყლის ხეობის მარცხენა ნაპირზე აღინიშნება, სადაც კირქვული მასივის ვერტიკალური და დამრეცი კედლები დანაპრალებულია. გამოქვაბულის მრავალრიცხოვან სიცარიელეებში უხვად გაედინება მიწისქვეშა წყლები, თუმცა დედამიწის ზედაპირზე მხოლოდ რამდენიმე ნაკადულის გამოსასვლელი გვხვდება. მღვიმის შესასვლელი ქვის ნაზვავით არის ჩაკეტილი. შურუბუმუს მღვიმისთვის დამახასიათებლია ვიწრო ხვრელები. სიღრუეები სიფონური წყლით იკეტება, მაგრამ გავლა ბოლომდე შესაძლებელია. გარდა თავად მღვიმის სილამაზისა და უნუკალურობისა, შურუბუმუს მღვიმე მოქცეულია საოცარ შემოგარენში. დაბურული ტყე, დახავსებული ლოდები, უძველესი ბზის კორომები და პატარ-პატარა ჩანჩქერები მომნუსხველ პეიზაჟებს ქმნის. აქ შეიძლება თავი ზღაპრის გმირად წარმოიდგინოთ. მღვიმე ჯერაც არ არის ბოლომდე შესწავლილი. აქ ხელუხლებელი, სრულიად ბუნებრივი გარემო დაგხვდებათ, რაც კიდევ უფრო მეტ ხიბლს სძენს ამ ადგილს თავგადასავლების მოყვარულთათვის. თუკი ველური ბუნება, ხეტიალი და მრავალფეროვნება გიყვართ შურუბუმუს მღვიმე ნამდვილად დაუვიწყარი შთაბეჭდილებებით აგავსებთ.