სულორის ხარების ეკლესია

სულორის ხარების ეკლესია იმერეთის მხარეში, ვანის მუნიციპალიტეტის სოფელ სულორში მდებარეობს. ტაძარი აგებულია XXI საუკუნეში. თლილი ქვით ნაგები დარბაზული ეკლესია აღმოსავლეთით, გარეთ გამოსული, ნახევარწრიული აფსიდით სრულდება. აფსიდის წყობაში, დარბაზის ფასადებთან შედარებით, უფრო მცირე ზომის ქვებია გამოყენებული. დასავლეთის ფასადი, შესასვლელის ორივე მხარეს სიმეტრიულად განლაგებული, ძირითადი სიბრტყიდან წყობის მცირედი შეწევით შექმნილი სწორკუთხედებითაა დეკორირებული, რომლებშიც თითო თაღოვანი სარკმელია გაჭრილი. ეკლესიის ყველა სარკმელი თაღოვანია. შესასვლელი სამია, სამივე თაღოვანი, სამხრეთის, დასავლეთის და ჩრდილოეთის მხრიდან. ჩრდილოეთის და სამხრეთის სარკმლებისა და სამივე შესასვლელის თავზე პირამიდისებური ფორმის დეკორია ჩასმული. ტაძარი გადახურულია თუნუქით. 

როგორ მივიდეთ

სოფელი სულორი იმერეთის მხარეში, ვანის მუნიციპალიტეტში მდებარეობს, ვანიდან 11 კმ-ის დაშორებით. სულორის ხარების ეკლესიასთან მიდის სამანქანო გზა.