თამარის ხიდი რკონში

რკონის "თამარის ხიდი" შიდა ქართლის მხარეში, კასპის მუნიციპალიტეტში, სოფელ ჩაჩუბეთთან ახლოს მდებარეობს. იგი რკონის სამონასტრო კომპლექსის ნაწილია. XII-XIII საუკუნეებში რკონზე შიდა ქართლს ჯავახეთთან, თრიალეთთან და ახლო აღმოსავლეთთან დამაკვშირებელი მნიშვნელოვანი სავაჭრო და სამხედრო-სტრატეგიული გზა გადიოდა. ამან რკონში სამონასტრო აღმშენებლობას შეუწყო ხელი. კომპლექსი სხვადასხვა პერიოდის ძეგლებისგან შედგება, თავად რკონის ხიდი მდინარე თეძამზეა გადებული და XII-XIII საუკუნეებით თარიღდება. ნახევარწრიული ხიდი ერთ მთლიანობას წარმოადგენს და 12,5მ სიგრძისაა, სიგანე კი 2,2მ-ა. ხიდის ბურჯები ბუნებრივ კლდოვან საფუძველს ეყრდნობა და ნაგებია ნატეხი ქვით კირის დუღაბზე. იგი შემორჩენილია თავდაპირველი სახით და საქართველოს ფეოდალური ხანის ხიდების ერთ-ერთ საუკეთესო ნიმუშს წარმოადგენს.