თელავის თეატრი

თელავის თეატრი კახეთში, ქალაქ თელავში, ერეკლე II-ის მოედანზე მდებარეობს. ქალაქში თეატრალურ ცხოვრებას დიდი ხნის ისტორია აქვს, აქ სპექტაკლები ჯერ კიდევ ერეკლე მეფის დროს იმართებოდა. ერეკლე II-ის მიერ რუსეთში განათლების მისაღებად გაგზავნილმა ახალგაზრდათა ერთმა ჯგუფმა, სამშობლოში დაბრუნების შემდეგ, თეატრალური დასის შექმნა გადაწყვიტა. თეატრს სათავეში გიორგი ავალიშვილი ედგა. თელავის თეატრში ამავე დროს მოღვაწეობდა თეატრალური ხელოვნებით გატაცებული გაბრიელ მაიორი. 1795 წელს, აღა-მაჰმად ხანის შემოსევისას, უთანასწორო დაპირისპირებაში მსახიობთა რაზმიც იბრძოდა. ამავე ბრძოლაში დაიღუპა გაბრიელ მაიორი. ქართული პროფესიული თეატრის განახლების შემდეგ, პირველ ოფიციალურ ცნობას თელავის თეატრის შესახებ 1867 წელს გაზეთი "ივერია" გვაწვდის. პროფესიული თეატრი თელავში 1931-1932 წლებში გაიხსნა. თელავის თეატრი დღემდე აქტიურად აგრძელებს მოღვაწეობას და მას ქალაქის კულტურულ ცხოვრებაში მნიშვნელოვანი ადგილი უჭირავს.