თეთრი წყლები

კურორტი თეთრი წყლები კახეთში, თელავის მუნიციპალიტეტში, სოფელ თეთრი წყლების ტერიტორიაზე მდებარეობს, გომბორის ქედის ჩრდილო-აღმოსავლეთ კალთაზე, ზღვის დონიდან 1200 მეტრზე. სოფელი ლამაზი ბუნებით გამოირჩევა, ტყეები, მთები და შესანიშნავი ხედები საუკეთესო გარემოს ქმნის ბუნების სიმშვიდეში დასვენების მოყვარულთათვის. კურორტის მთავარი სამკურნალო ფაქტორია გოგირდოვანი წყლები. გარდა სილამაზისა და ბუნებრივი რესურსებისა, თეთრი წყლები კულტურული თვალსაზრისითაც საინტერესოა. სოფლის ტერიტორიები უძველესი დროიდამ ჯერ კიდევ ბრინჯაოს ხანიდან ყოფილა დასახლებული, რაზეც აქ გამოვლენილი მრავალფენიანი ნაქალაქარი მეტყველებს. აქ ასევე შეგიძლიათ მოინახულოთ შუასაუკუნეების ეკლესიები და ციხე-სიმაგრეები, როგორიცაა: VIII-IX საუკუნეების ღვთისმშობლის ეკლესიის ნანგრევი, VII-XVI საუკუნეების კუნტურის ეკლესია, ქაჯიანხევის გვიანი შუასაუკუნეების ეკლესიის ნანგრევი და სხვა. განსაკუთრებულად ცნობილი ძეგლია ფსიტის ციხე, რომლის უძველესი ფენები V-VI საუკუნეებით თარიღდება. კურორტი თეთრი წყლები მიმზიდველი ადგილია, როგორც გამაჯანსაღებელი, სასიამოვნო დასვენების მსურველთათვის, ასევე კულტურით დაინტერესებული ადამიანებისთვის.