წმინდა გიორგისა და წმინდა თეოდორეს სახელობის ეკლესია

წმინდა გიორგისა და წმინდა თეოდორეს ეკლესია შიდა ქართლის მხარეში, კასპის მუნიციპალიტეტში, სოფელ თელათგორის ცინტრში მდებარეობს. ტაძარი გვიანი შუასაუკუნეებით თარიღდება. ნაგებობა დარბაზულია და აღმოსავლეთით ნახევარწრიული აფსიდით სრულდება. საკურთხევლის იატაკი ამაღლებულია ერთი საფეხურით. აფსიდის ცენტრალურ ღერძზე შიგნიდან სწორკუთხა, გარედან თაღოვანი სარკმელია. ფასადებს თაროსებრი ლავგარდანი შემოუყვება, რომელიც უფრო გვიანდელი პერიოდისაა. ტაძარი ნაგებია უხეშად გათლილი საშუალო ზომის ქვიშაქვის კვადრებით, წყობაში გამოყენებულია დიდი ზომის ქვებიც. ნაგებობას დასავლეთიდან სწორკუთხა ეკლესია აქვს მიშენებული, რომელიც წმინდა თევდორეს სახელს ატარებს. ეს ეკლესიაც ქვიშაქვითაა ნაგები, თუმცა უფრო მცირე ზომის ქვებით, ვიდრე წმ. გიორგის ტაძარი. ეს ორი ეკლესია ერთმანეთს განიერი სწორკუთხა ღიობით უკავშირდება. წმ. თევდორეს ეკლესიისთვის დასავლეთით კარიბჭე მიუშენებიათ უახლოეს წარსულში. კარიბჭე ნაგებია საკმაოდ დიდი ზომის, უხეშად დამუშავებული ქვითა და აგურით. წმ. გიორგის ეკლესიაც და მინაშენებიც გადახურულია კრამიტით.