წმინდა თევდორეს ეკლესია ახალქალაქში (კასპი)

ახალქალაქის წმინდა თევდორეს ეკლესია შიდა ქართლის მხარეში, კასპის მუნიციპალიტეტის სოფელ ახალქალაქში მდებარეობს, სოფლის ცენტრში. იგი XIX საუკუნით დათარიღებული, რიყისა და ნატეხი ქვით ნაშენი დარბაზული ნაგებობაა. ეკლესიის ინტერიერში აღმოსავლეთით ნახევარწრიული აფსიდია. საკურთხეველს ძირითადი სივრცისგან კანკელი გამოყოფს. კანკელი ახალი გაკეთებულია. ტაძარი ერთ თაღსა და გრძივ კედლებზე დაყრდნობილი ნახევარცილინდრული კამარითაა გადახურული. თაღი პილასტრებს ეყრდნობა. აფსიდის ცენტრში მოზრდილი სარკმელია, რომლის ორივე მხარეს თითო ნიშია განლაგებული. სამხრეთისა და ჩრდილოეთის კედლებში ორი-ორი საკმაოდ დიდი სარკმელია. შესასვლელი ორია, დასავლეთითა და ჩრდილოეთით. სარკმლებიცა და შესასვლელებიც პილასტრებზე დაყრდნობილი თაღებითაა დეკორირებული. პილასტრებს ორნამენტული კაპიტელები აქვს. დასავლეთის კედელს სამი მხრიდან თაღებით გახსნილი ფანჩატური აქვს მიშენებული, მეოთხე მხარეს კი ტაძარში შესასვლელი კარია. სვეტებს, რომლებსაც თაღები ეყრდნობა, სადა პროფილის ბაზისები და კაპიტელები აქვს. იმაფე ფასადის ფრონტონის ცენტრშია აღმართული სამრეკლოს ფანჩატურიც. სამრეკლოს ფანჩატური ოთხივე მხარეს წრიულ სვეტებზე დაყრდნობილი თაღებითაა გახსნილი და პირამიდული გადახურვა აქვს. ეკლესია გადახურულია კრამიტით.