ტანიეს ტბა

ტანიეს ტბა მდებარეობს ხევსურეთში, კონკრეტულად არხოტში, მდინარე ტანიეს წყლის ხეობაში, დუშეთის მუნიციპალიტეტში. ტბა მოქცეულია ორ უზარმაზარ მთას შორის. ტბას აქვს გულის ფორმა რაც მას ახალგაზრდებისთვის უფრო მიმზიდველს ხდის. ტანიეს ტბა სუფთა და კამკამა წყლით გამოირჩევა, რადგან მასში ჩამავალი ნაკადი მიწისაგან იფილტრება და იშვიათად იმღვრევა. ზაფხულში ტანიეს ტბაში წყალი საკმაოდ თბილია სხვა მთის ტბებთან შედარებით.

ტბასთან მისვლა შესაძლებელია საცხენოსნო და საცალფეხო ბილიკებით, როდესაც თოვლის საფარი დაბალია ან დამდნარი.

ტანიეს ტბის მარშრუტის რამდენიმე ვერსია არსებობს. ის მდებარეობს საკმაოდ პოპულარულ სალაშქრო მარშრუტზე, რომელიც მთელ ტანიეს ხეობას გაივლის. თუმცა თითოეული მარშრუტი შეიძლება შევარჩიოთ თავისუფალი დღეების მიხედვით. ტბის მონახულებას მინიმუმ ორი სრული დღე სჭირდება. თუ თქვენ ორი დღის მეტი არ გემეტებათ ამ სილამაზისთვის მაშინ თქვენი მარშრუტი იწყება სოფელ უკანხადუში, ატაბეს მახლობლად და მიუყვება ბილიკს ტანიეს უღელტეხილისაკენ სადაც სავარაუდოდ საღამოს მიაღწევთ. ჩვენი რეკომენდაციაა, დაბანაკდეთ უღელტეხილთან ახლოს, წყლიან, უქარო ადგილას და მხოლოდ მეორე დღეს დაეშვათ ტბის მოსანახულებლად ჩანთების გარეშე, რადგან ტბა უღელტეხილიდან დაახლოებით 5 კილომეტრში მდებარეობს და საკმაოდ დიდი დაღმართის ჩავლა გიწევთ რომელიც უკანა გზაზე აღმართად გადაგექცევათ.

სწორედ ამიტომ სჯობს ჩანთების გარეშე ამ გზაზე გადაადგილება. ჩანთებს ბანაკში დატოვებთ და უკან დაბრუნებულებს 2-3 საათის გზა გექნებათ უკანხადუმდე სადაც მანქანა გელოდებათ. აღსანიშნავია, რომ უკანხადუდან ასასვლელი ბილიკი ძალიან რთულია და ბევრი გამოცდილი მოლაშქრეც კი ავად მოიხსენიებს ამ აღმართს, რადგან აქ მანძილი სულ რაღაც 6 კილომეტრია ხოლო სიმაღლეთა სხვაობა 1200 მეტრი. რაც ნიშნავს, რომ ერთ კილომეტრში საშუალოდ 200 მეტრის აწევა გიწევთ.

თუმცა სანამ ტანიეს ტბის მოსანახულებლად წახვალთ, აუცილებლად იქონიეთ თან GPS მოწყობილობა ან უბრალოდ თქვენი ტელეფონი რომელზეც ჩაწერთ რომელიმე GPS აპლიკაციას და თქვენს მიერ მიზანდასახულ GPS მარშრუტს. ის დაგეხმარებათ გზა გაიკვლიოთ ნისლში, ვინაიდან მთაში ნისლში ორიენტირება ძალიან რთულია. თუ GPS აპლიკაცია არასოდეს გამოგიყენებიათ აუცილებლად წაიკითხეთ სტატია GPS აპლიკაციების შესახებ.