ბედიანი

დაბა ბედიანი ქვემო ქართლის მხარეში, წალკის მუნიციპალიტეტში, მდინარე ხრამის მარჯვენა ნაპირზე მდებარეობს, ზღვის დონიდან 850 მეტრზე. ბედიანი და მისი მიდამოები უმეტესწილად ტყეებით არის დაფარული, რაც ძალიან ლამაზ გარემოს ქმნის. დაბა საინტერესოა კულტურულ-ისტორიული ძეგლებითაც. აქ მდებარეობს მოდიმნახეს ციხე, ვარდისჭალის წმ. გიორგის ეკლესია, ფერისცვალების ეკლესია და “ჭეჭეს საყდარი”. ბედიანის ტერიტორიაზე ადრეული შუასაუკუნეებიდან არსებობდა სამონასტრო კომპლექსები. ბედიანის დასახლებას 1954 წელს ჩაეყარა საფუძველი, რომელიც ხრამჰესების კასკადის ბაზაზე გაჩნდა. დაბის პირველ მოსახლეობას სწორედ ამ მშენებლობაზე მომუშავე ხალხი წარმოადგენდა. 1963 წელს ბედიანის ტერიტორიაზე რესპუბლიკურმა ფსიქონერვოლოგიურმა საავადმყოფომ დაიწყო ფუნქციონირება. იგი 800 ავადმყოფზე იყო გათვლილი. დაბის გაჩენამ სოციალური ინფრასტრუქტურების ჩამოყალიბება განაპირობა, გაიხსნა სამედიცინო ამბულატორია და შეიქმნა 220 მოსწავლეზე გათვლილი სკოლა. 80-იანი წლების ბოლოსა და 90-იანების დასაწყისში ქვეყანაში განვითარებული ეკონომიკური და პოლიტიკური კრიზისი მთელი ბედიანის ცხოვრებაზეც აისახა. 90-იანი წლების ბოლოსათვის დაბაში ძალიან შემცირდა მოსახლეობის რიცხოვნობა. 1999 წელს დაბაში ახალმოსახლეობა გაჩნდა, რომლებიც გიორგი მთაწმიდელის სახელობის დედათა მონასტერთან არსებული ბავშვთა ცენტრის აღსაზრდელებს და მათ აღმზრდელებს შეადგენდნენ. აღდგა დედათა მონასტერი, სადაც თბილისის ფერისცვალების დედათა მონასტრიდან მონაზვნები გადმოიყვანეს. ბედიანში გადმოსული ბავშვები სხვადასხვა სახლებში განაწილდნენ და მათთან ერთი ან ორი აღმზრდელი ცხოვრობს. 2014 წლის აღწერის მიხედვით დაბის მოსახლეობა 148 მცხოვრებს შეადგენს.