ბეთანია-კვესეთი

თბილისის გარშემო მრავალი საინტერესო და მშვენიერი ადგილია, სადაც შეგიძლიათ ერთი დღით გახვიდეთ და კარგი დრო გაატაროთ, დატკბეთ ლამაზი ბუნებით და უბრალოდ ისიამოვნოთ სიმშვიდით. ერთ-ერთი ასეთი ადგილი არის სწორედ ბეთანიის მონასტერი. ამ მარშრუტის გავლისას აღმოაჩენთ აქამდე თქვენთვის უცნობ ადგილებს, ნახავთ არაჩვეულებრივ პანორამულ ხედებს ბეთანიის მონასტერზე, მდინარე ვერეს ხეობასა და თრიალეთის ქედის სამხრეთ ფერდობებზე. მარშრუტი იწყება თბილისი-წყნეთი-მანგლისის დამაკავშირებელი საავტომობილო გზიდან, საიდანაც უხვევს ჩრდილოეთით და გაივლის ბეთანიის დასახლებას, შემდეგ გრუნტოვანი გზა შედის ტყეში, რომელიც გადადის ბილიკში და მიუყვება მთის თხემს. გარკვეული მანძილის გავლის შემდეგ თქვენ მიადგებით თხემის დასასრულს, სადაც დგას ჯვარი და იშლება ულამაზესი პანორამული ხედები. გზას აგრძელებთ ბილიკის მიმართულებით, რომელიც ეშვება ხეობაში, ხოლო მცირე აღმართის ავლის შემდეგ თქვენს თვალწინ გადაიშლება ბეთანიის ულამაზესი და მწვანეში ჩაფლული მონასტერი. აქ შეგიძლიათ იხილოთ თამარ მეფის უძველესი ფრესკა. მონასტრის მონახულების შემდეგ გრუნტოვანი გზით მიემართებით და გიწევთ საკმაო აღმართების ავლა. მარშრუტს ასრულებთ კვლავ თბილისი-წყნეთი-მანგლისის დამაკავშირებელ საავტომობილო გზასთან.

ძირითადი ტექნიკური ინფორმაცია:

მარშრუტის მთლიანი გასავლელი მანძილი შეადგენ 13.5 კილომეტრს და გიწევთ ჯერ დაეშვათ 530 მეტრით, ხოლო შემდეგ ასწიოთ 650 მეტრი. მარშრუტის სიმარტივიდან გამომდინარე მისი გავლა შესაძლებელია რამდენიმე საათში მსუბუქი აღჭურვილობით. ბილიკი იწყება თბილისი-წყნეთი-მანგლისის დამაკავშირებელი საავტომობილო გზიდან, ჩრდილოეთით მიუყვება ჯერ დასახლება ბეთანიას, ხოლო შემდეგ მთის თხემს, საიდანაც ეშვება ბეთანიის მონასტერთან. მონასტრის შემდეგ გზას აგრძელებთ კვესეთისკენ და ისევ უერთდებით თბილისი-წყნეთი-მანგლისის დამაკავშირებელ საავტომობილო გზას.

სირთულე: მარტივი

აღნიშნული მარშრუტი გადის მარტივ კატეგორიაში. თავდაპირველად მცირე მანძილზე გხვდებათ მოასფალტებული გზა, შემდეგ გრუნტოვანი გზით შედიხართ ტყეში და ბოლოს გადადიხართ ბილიკზე, რომელიც მთის თხემს მიუყვება. პანორამული გადასახედიდან მონასტრამდე ბილიკი ჩადის დამრეც ფერდობზე. ბეთანიის მონასტრიდან მარშრუტის დასასრულამდე სიარული გიწევთ გრუნტოვან გზაზე.

რეკომენდაციები:

მარშრუტზე დაგჭირდებათ მსუბუქი აღჭურვილობა, ერთი დღის სამყოფი საკვები საპიკნიკედ და წყალი 1-1.5 ლიტრი, თუმცა გზაში შევსება რამდენიმე ადგილასაა შესაძლებელი.