ატენის კვირაცხოვლის სახელობის ეკლესია

ატენის კვირაცხოვლის სახელობის ეკლესია შიდა ქართლის მხარეში, გორის მუნიციპალიტეტში, სოფელ დიდი ატენის მესამე უბნის დასავლეთ ნაწილში მდებარეობს. იგი განვითარებული შუასაუკუნეების, არაწესიერი ფორმის თლილი ქვით ნაშენი დარბაზული ნაგებობაა. ლავგარდნის წყობაში გამოყენებულია აგურიც. გეგმაში სწორკუთხა ნაგებობა აღმოსავლეთით ნახევარწრიული აფსიდით სრულდება. აფსიდში ერთი ვიწრო თაღოვანი სარკმელი და ორი პატარა კვადრატული ნიშია. თითო თაღოვანი სარკმელია გაჭრილი ტაძრის დანარჩენ კელებშიც. სამხრეთის სარკმელს ეტყობა, რომ მოგვიანებით გაუფართოებიათ და გადაუკეთებიათ. აფსიდის ორივე მხარეს, კედელში, მცირე ზომის აფსიდიანი სამკვეთლო და სადიაკვნეა, რომლებსაც აღმოსავლეთით თითო ვიჭრო სარკმელი აქვს. საკურთხევლის ბაქანი, დარბაზის იატაკთან შედარებით, ორი საფეხურითაა ამაღლებული. იატაკები კვადრატული აგურისაა. ეკლესია გადახურულია შეისრული კამარით. ორქანობა სახურავი კრამიტისაა. აღმოსავლეთ კედლის ფრონტონის თავზე ოთხივე მხარეს თაღებით გახსნილი, პირამიდულსახურავიანი, გეგმაში კვადრატის ფორმის, აგურის სამრეკლოა დაშენებული. ეკლესიას ორი, გარედან სწორკუთხა, შიგნიდან კი - თაღოვანი, შესასვლელი აქვს, ჩრდილოეთიდან და დასავლეთიდან. დასავლეთის შესასვლელის გვერდებზე და ჩრდილოეთის კედლის აღმოსავლეთ ნაწილში თითო ოთხკუთხა ნიშია. ტაძრის ეზოს სწორკუთხა გალავანი ჰქონია შემოვლებული, რომელიც ფრაგმენტების სახითაა შემორჩენილი.

როგორ მივიდეთ

სოფელი დიდი ატენი შიდა ქართლის მხარეში, გორის მუნიციპალიტეტში მდებარეობს, გორიდან 10 კმ-ის დაშორებით. სოფელში მიდის სამანქანო გზა. ასფალტის გზა დაზიანებულია, სედანით მისვლა შესაძლებელია.