გომისმთა - ბახმარო

მარშრუტი იწყება კურორტ გომისმთიდან და გადადის კურორტ ბახმაროში. კურორტი გომისმთა მდებარეობს ზღვის დონიდან 2100-2755 მეტრზე, ბახმარო 1950-2050 მეტრზე.

მარშრუტის საწყისი წერტილი მდებარეობს ზღვის დონიდან 2000 მეტრზე, საბოლოო წერტილი 1950 მეტრზე. გასავლელი მანძილი 40 კმ. უმაღლესი წერტილი 2614 მეტრი (მწ. მგლის საწოლი). ასაწევი სიმაღლე ჯამში 1470 მეტრი, ხოლო დასაწევი სიმაღლე ჯამში 1485 მეტრი.

მარშრუტის გასავლელად საჭიროა მაღალი გამავლობის ავტომობილი. მარშრუტის გავლა შესაძლებელია ფეხითაც, ამ შემთხვევაში მარშრუტი გამოდის 2 დღიანი.

ღირსშესანიშნაობები:

• ჭინჭაოს ტბა;
• მწვერვალი "მგლის საწოლი";
• საზაფხულო სოფლები;
• პანორამული ხედები;
• სათოვლიას წყალი (ტბა);

დეტალური აღწერა:

მარშრუტი გადის ალპურ ზონაში, ქედზე, სამანქანე გრუნტიანი გზით. საწყისი 7 კმ მეტრი არის მცირე აღმართი, ამის შემდეგ მომდევნო 3 კმ გზა მიუყვება შედარებით რთულ აღმართს და მეათე კილომეტრზე გზა გაივლის ჭინჭაოს ტბასთან, ზღვის ზონიდან 2500 მეტრზე. ჭინჭაოს ტბიდან დაახლოებით 6 კმ-ში გზა გაივლის მწვერვალ მგლის საწოლთან, საიდანაც შესანიშნავი პანორამული ხედები იშლება. მწვერვალიდან დაახლოებით 2 კმ ში, მცირე აღმართ-დაღმართების შემდგომ, გზა გაივლის საზაფხულო სოფლებს, ზღვის დონიდან 2400 მეტრზე, სადაც შესაძლებელია სოფლების მონახულება და წყლის შევსება. საზაფხულო სოფლების შემდგომ გზა ეშვება 2000 მეტრამდე და 22 კმ - ზე იწყება უღელტეხილი. გზის 28 კმ-ზე გზად შეხვდებით მცირე ზომის ტბას, რომელსაც სათოვლიას წყალს უწოდებენ, ტბიდან ერთ კილომეტრზე ნაკლებ მანძილში, გზადვე შეხვდებით წყაროს წყალს, 2400 მეტრზე. წყაროდან გზა დაღმართში ეშვება და 10 კმ- ში ჩადის ბახმაროში. ბოლო ათი კილომეტრის მანძილზე რამდენჯერმე შეხვდებით წყალს და ასევე ბახმაროსთან ახლოს მდებარე საზაფხულო სოფლებს.