კავთისხევის წმინდა გიორგის სახელობის ეკლესია

კავთისხევის წმინდა გიორგის სახელობის ეკლესია შიდა ქართლის მხარეში, კასპის მუნიციპალიტეტის სოფელ კავთისხევში მდებარეობს. იგი V-VII საუკუნეებით დათარიღებული დარბაზული ეკლესიაა. გეგმაში სწორკუთხა ნაგებობა აღმოსავლეთით გარეთ გამოსული ნახევარწრიული აფსიდით სრულდება. ეკლესია ნაგებია სხვადასხვა ზომის ქვებით, დეკორისთვის გამოყენებულია აგურიც. შესასვლელი თავიდან ორი ყოფილა, დასავლეთითა და სამხრეთით, ორივე თაღოვანი. დასავლეთის შესასვლელი აჟამად ამოქოლილია. თაღოვანია ტაძრის სარკმლებიც. შსასვლელებისა და სარკმლების თაღები აგურის წყობითაა დეკორირებული. ჩრდილოეთითა და სამხრეთით მცირე ზომის მკლავებია. ფასადების ფრონტონებში სიბრტყის შეწევით შექმნილი ჯვრის გამოსახულებებია მოთავსებული. ფასადებს სადა ლავგარდანი შემოუყვება. ეკლესიის სახურავის კეხის დასავლეთ კიდეში აგურით ნაგები სამრეკლოა აღმართული. სამრეკლო ოთხივე მხარეს თაღებით გახსნილ ფანჩატურს წარმოადგენს და პირამიდული აგურისავე გადახურვა აქვს. ეკლესია გადახურულია ღარიანი კრამიტით. კავთისხევის წმინდა გიორგის ეკლესიის აღმოსავლეთით, მასთან ძალიან ახლოს (თითქმის ერთმანეთს არიან მიდგმული), დგას ლომისის სამების ეკლესია.