ხალდე

სოფელი ხალდე მდებარეობს სამეგრელო-ზემო სვანეთის მხარის მესტიის მუნიციპალიტეტში, კალას თემში, ჩხუტნერის ქედის სამხრეთით, ხალდეჭალის ხეობაში, ზღვის დონიდან 1900 მ.

როგორ მოვხვდეთ ხალდეში?

ხალდეში მოსახვედრად საჭიროა მესტიაში ჩასვლა, საკუთარი ავტომობილით ან საზოგადოებრივი ტრანსპორტით. მესტიაში ასევე სრულდება ავიარეისები მესტია-ქუთაისის და მესტია-თბილისის მიმართულებით. მესტიიდან სოფელ ხალდემდე მანძილი 40 კილომეტრია, გზის დასაფარად საჭიროა მაღალი გამავლობის ავტომობილი. მესტიის ცენტრში შესაძლებელია ტაქსის დაქირავება.

ინფრასტრუქტურა

ხალდე საკმაოდ პატარა, მაღალმთიანი სოფელია, აქ ინფრასტრუქტურა კარგად განვითარებული არ არის, თუმცა ფუნქციონირებს საოჯახო სასტუმრო და რესტორანი, სადაც სურვილისამებრ შეძლებთ ღამისთევას ან ადგიობრივი კერძების დაგემოვნებას.

სოფელს ხშირად სტუმრობს ადგილობრივი თუ უცხოელი ვიზიტორები. ძირითადად ეწყობა ლაშქრობა ხალდეს მყინვარზე, რომელიც სოფლიდან 6 კილომეტრის დაშორებით მდებარეობს. ასევე შესაძლებელია ხალდე-უშგულის მარშრუტის გავლა.

ისტორია

ხალდე მოთავე იყო აჯანყებისა მეფის რუსეთის წინააღმდეგ. სოფლის მოსახლეობამ ბოლომდე იბრძოლა აჯანყების დროს, რის გამოც, სოფელი თავის კოშკებიანად პირწმინდად გაანადგურეს. მას შემდეგ ხალდე დაცარიელდა, რუსეთის მთავრობამ აკრძალა ხალდეში დასახლება და მას „ახალი იფრარი“ დაარქვა. ხალდეს გმირებს სვანები დღესაც დიდი პატივით მოიხსენიებენ, მათზე შექმნილია შესანიშნავი სიმღერა - ფერხული „გაულ-გავხე“.