ხალდეს მაცხოვრის ეკლესია

ხალდეს მაცხოვრის ეკლესია სვანეთში, მესტიის მუნიციპალიტეტში, კალის თემის სოფელ ხალდეში მდებარეობს. იგი XIX საუკუნის ფიქლით ნაშენი დარბაზული ნაგებობაა. დღევანდელი ტაძრის ადგილას ყოფილა განვითარებული შუასაუკუნეების ეკლესია მოხატული ინტერიერით, რომელიც ხალდეს აჯანყებისას რუსებმა სრულიად გაანადგურეს. ტაძრის მხატვრობა აღწერილი აქვს დიმტრი ბაქრაძეს. ძველი ეკლესიისგან შემორჩენილი კარნიზის ქვები გამოყენებულია ახალი ნაგებობის დეკორისთვის. ხალდეს მაცხოვრის ეკლესიაში დაცულია X საუკუნის, ჭედური, მცირე ზომის წმ. გიორგის ხატი. ტაძრის დასავლეთ კედელში თაღოვანი შესასვლელია. ინტერიერიცა და ექსტერიერიც შებათქაშებული ყოფილა, თუმცა დღესდღეობით ბათქაში მხოლოდ ნაწილობრივაა შემორჩენილი. ხის, მოჩუქურთმებული კარი და კანკელი ახალია და ადგილობრივი ხეზე მკვეთის, ჯაბა ჯოხაძის მიერაა შენაწირი.