კლდეისი

კლდეისი სოფლების - დიდი კლდეისისა და პატარა კლდეისის ძველი სახელწოდებაა. ეს ორი სოფელი ერთმანეთის გვერდით მდებარეობს, ქვემო ქართლის მხარეში, თეთრიწყაროს მუნიციპალიტეტში. დიდი და პატარა კლდეისი ხრამის ხეობაში, კლდეისის წყლის მარჯვენა მხარეს არიან განლაგებული, ზღვის დონიდან 1380 მეტრზე. კლდეისში შემორჩენილია შუასაუკუნეების ნამოსახლარები და ტაძრები. აქ გადიოდა მნიშვნელოვანი გზა, რომელიც თრიალეთს სამშვილდეს უკავშირებდა. ეს სოფელი არქეოლოგიურად შეუსწავლელია, სავარაუდოა, რომ აქ უფრო ადრეული ცხოვრების კვალიც აღმოჩნდეს. კლდეისი შემდეგ წერილობით წყაროებში იხსენიება: ვახუშტი ბაგრატიონის „აღწერა სამეფოსა საქართველოსა“, იოანე ბაგრატიონის „ქართლ-კახეთის აღწერა“ და XVI-XVIII საუკუნეების ისტორიული საბუთები. სოფელი და მისი შემოგარენი ლამაზი ბუნებითაც გამოირჩევა. ტყეები, ხეობა, მაღალი ჩანჩქერი და ბუნებრივი მღვიმე-საყინულე შესანიშნავ გარემოს ქმნის ბუნების სიმშვიდეში განტვირთვისა და ხეტიალის მოყვარულთათვის. კლდეისში შეგიძლიათ მოინახულოთ X-XI საუკუნეების ღვთისმშობლის ეკლესია, ადრეული შუასაუკუნეების წმ. გიორგის ეკლესია, ციხე-სიმაგრის ნანგრევები და ხორხების საყინულე.